ОХУ-ын анхны хиймэл оюун ухаант хүн дүрст роботыг арваннэгдүгээр сарын 10-нд Москва хотноо болсон технологийн арга хэмжээний үеэр албан ёсоор танилцууллаа. Гэвч энэ үеэр “Aidol” нэртэй тус робот тайзан дээр тэнцвэрээ алдан унаж, шуугиан дэгдээв. Ажилтнууд роботыг засахыг оролдохын зэрэгцээ олны нүднээс яаран холдуулжээ.

Робот тэнцвэр алдаж унасан нь тохируулгын алдаанаас болсон гэж робот хөгжүүлэлтийн “Idol” компани мэдэгджээ. Одоогоор робот туршилтын үе шатандаа явж байгаа гэдгийг компанийн захирал Владимир Витухин хэлэв.

Тэрбээр танилцуулгын үеэр үг хэлэхдээ “Робот маань инээмсэглэж, бодож, гайхаж чадна, яг л хүн шиг. Зөв алдааг мэдлэг болгож хувирган, таагүй алдааг туршлага болгосон бодит сургалт байлаа” гэсэн юм.

“Aidol” роботыг танилцуулснаараа ОХУ хиймэл оюун ухаант хүн дүрст робот хөгжүүлэх дэлхийн өрсөлдөөнд хөл тавьж байна. Гэвч нээлтийн үеэр болсон бүтэлгүйтлийн дараа Оросын робот техникийн салбар олон улсын хэмжээнд өрсөлдөхөд бэлэн байгаа эсэхийг шүүүмжлэгчид асууж байна.

Хөгжүүлэгчдийн мэдээлж буйгаар, “Aidol” робот зургаан цаг хүртэл тасралтгүй ажиллах чадвартай 48 вольтын батерейгаар ажилладаг. Мөн роботын 77 хувь нь Орост үйлдвэрлэсэн эд анги. Ирээдүйд энэ тоог 93 хувь хүртэл нэмэгдүүлэхийг хөгжүүлэгчид зорьж байна. Түүнчлэн “Aidol” робот нь 19 сервомотороор тоноглогдсон тул 10 гаруй үндсэн сэтгэл хөдлөлтэй, хэдэн 100 бичил илэрхийлэмж гаргах чадвартай. Нүүр хэсгийн силикон хийц нь хүний царайны хувирлыг янз бүрээр хуулбарлан гаргах чадамжтай.