Засгийн газраас 2026 оныг “Боловсролыг дэмжих жил” болгон зарласан бөгөөд боловсролын салбарын төсөв 2025 оны арваннэгдүгээр сарын 12-нд батлагдсан. Энэ жил боловсролын салбарын төсөв 5.4 их наяд төгрөг хүрч, өмнөх оноос 1,117.0 тэрбум төгрөгөөр нэмэгдэхээр тус өдөр баталсан юм. Батлагдсан төсвийн 4.39 их наяд төгрөгийг урсгал зардалд, 1.1 их наяд төгрөгийг хөрөнгө оруулалтад, 117.1 тэрбум төгрөгийг эргэн төлөгдөх зээлд зарцуулахаар тусгасан аж. Энэ жилийн боловсролын салбарын төсвийн 4.78 их наяд төгрөгийг улсын төсвөөс, 111.4 тэрбумыг зээлээс, 5.5 тэрбумыг үйл ажиллагааны орлогоос бүрдүүлэхээр болжээ.

Улмаар нийслэлд 25 төсөл хэрэгжих бөгөөд дөрвөн төсөл нь шинээр хэрэгжүүлэхээр болсон юм. Боловсролын салбарын зардал дотоодын нийт бүтээгдэхүүний 5.2 хувь, улсын нийт төсвийн зарлагын 16.4 хувийг эзэлж байна. Мөн 2026 оны улсын төсөвт шинээр ашиглалтад орох боловсролын байгууллагуудын тоног төхөөрөмжийн зардалд 56.6 тэрбум төгрөг тусгагдсан нь 2025 оны төсвөөс даруй хоёр дахин өссөн үзүүлэлт юм. Боловсролын яам, Сангийн яамтай хамтран сургууль, цэцэрлэг тус бүрийн хүчин чадалд нийцсэн тоног төхөөрөмжийн иж бүрэн хангалтыг төлөвлөж, нийт 17 төсөл, арга хэмжээ болгон задалсан байна.
Азийн хөгжлийн банкны /АХБ/ хөнгөлөлттэй зээлийн эх үүсвэрээр нийслэлд 17 сургууль барих зээлийн хэлэлцээрийг улсын төсвийн хамт өргөн барьж, батлуулсан нь газар чөлөөлөлт, зураг төсөл бүрэн хийгдээгүй нөхцөлд Төсвийн тухай хуулийн хүрээнд авч болох хамгийн оновчтой шийдэл гэж үзэж буй. Цаашид нийслэлийн хэмжээнд сургууль, цэцэрлэгийн хүртээмж, барилгын стандарт, халаалтын шинэчлэлийг үе шаттайгаар сайжруулах асуудлыг хамтран шийдвэрлэхээр төлөвлөж буй аж.