Японы ерөнхий сайд Санаэ Такаичи албан тушаалаа хүлээж авснаасаа хойш ажилдаа хамаг анхаарлаа төвлөрүүлж байна. Тэрбээр парламентын хуралдааны хуваарьтай өдөр үүрийн 03:00 цагт ажилдаа ирсэн нь олны анхаарлыг татав.

"Asahi Shimbun", "Mainichi Shimbun" сонинуудад мэдээлснээр, Такаичи арваннэгдүгээр сарын 8-ны өдөр 03:01 цагт Акасака дахь гэрээсээ гарч, 03:04 цагт албан өрөөндөө иржээ. Ингээд Төлөөлөгчдийн танхимын Төсвийн хорооны асуултуудад бэлдэж, гурван цагийн турш нарийн бичгийн дарга нартайгаа хуралдсан аж.

Ерөнхий сайд болон бусад сайд нар Төсвийн хорооны хуралд бэлдэж өглөө эрт ирэх нь нийтлэг боловч үүрийн 03:00 цаг үнэхээр ер бусын хэмээн олон нийт шагширч байна. Түүнийг яагаад 03:00 цагт ирснийг Төсвийн хорооны хурлын үеэр асуухад гэрт нь хуучны факс машин л байдаг тул ажил дээрээ эрт ирж, асуултуудад бэлдэх шаардлагатай байсан гэж хариулжээ. Мөн нарийн бичиг, хамгаалалтын ажилтнууд, жолооч нарт төвөг удсандаа хүлцэл өчжээ.

Такаичи одоогоор ерөнхий сайдын амьдардаг албан ёсны байрандаа нүүж ороогүй байгаа аж. Хурдхан шиг албан ёсны байрандаа нүүж орвол дээргүй юу гэж Японы Үндсэн хуульт ардчилсан намын гишүүн Такахиро Күроива хэлэхэд Такаичи хариуд нь "Би Өмнөд Африкт Их-20-ийн уулзалтад оролцох шаарлдагатай байгаа. Хуваарь тодорхой болчихвол аль болох хурдан нүүж орно" гэжээ.

Японы гурав дахь том сөрөг хүчин Ард түмний ардчилсан намын ерөнхий нарийн бичиг Казүюү Шинба үүнд шүүмжлэлтэй хандаж байна. Тэрбээр "Хэрвээ ерөнхий сайд нь 03:00 цагт ирэх юм бол бусад ажилтан 01:30 юм уу 02:00 цагт ирээд хүлээх ёстой биз дээ. Хүний бие физилоги ийм зүйлийг тэсч дийлэхгүй" гэжээ.

Угтаа бол Такаичигийн засаг захиргаа ажлын цагийн дээд хязгаарыг өөрчлөхөөр зорьж байгаа билээ.

Засгийн газрын хэвлэлийн төлөөлөгч Минорү Кихара нөхцөл байдлыг зөөлрүүлэн мэдэгдэл хийхдээ "Төсвийн хорооны асуултад үнэн зөв хариулах, парламентын хэлэлцүүлгийн жигд явуулахын тулд бэлтгэл шаардлагатай байдаг нь үнэн. Ерөнхий сайд ажил, амьдралын тэнцвэрийн тухай ойлголтыг үгүйсгэдэггүй. Тал бүрийн авьяас чадвартай хүмүүсийн тайван ажиллах нөхцлийг бүрдүүлэхийн тулд ажил, амьдралын тэнцвэрийг дэмжих нь чухал" гэжээ.

Такаичи үүрийн 03:00 цагт ажилдаа ирсэн тэр өдөр орой нь 19:50 цагт харьжээ.

Тэрбээр ажил, ажил гэсэн зарчимтайгаа анх удаа харуулж байгаа юм биш. Тодруулбал, өнгөрсөн сард Либерал ардчилсан намын даргаар сонгогдсоныхоо дараахан тэрбээр "Би ажил, амьдралын тэнцвэр гэсэн нэр томьёог хөсөр хаяж байна. Ажилла, ажилла, ажилла, ажилла, бас дахин ажилла" гэж тунхаглажээ.