Мэргэ төлөгч, фэн шуй мастер гэж өөрсдийгөө зарласан ээж, охин хоёр Австрали дахь вьетнамчуудаас бараг 70 сая австрали доллар (46 сая ам.доллар) залилжээ. 53 настай ээжийг 25 настай охиных нь хамтаар Сиднейн захын хорооллоос Лхагва гаригт /2025.11.12/ баривчилсан байна. Тэднийг маш нарийн төвөгтэй луйврын синдикатын нэг хэсэг гэж цагдаа нар мэдэгдэв.

Ээж гэх эмэгтэй нь хүмүүсийг хуурамчаар мэргэлж, ирээдүйд тэрбумтан болно гэж хэлдэг аж. Цаашилбал, ирээдүйд тэрбумтан болох юм чинь одоо зээл авчих гэж ятган, өөрөө тэндээс нь ашиг авдаг. Өнөөдөр түүний шүүх хурал болж байгаа бөгөөд гэмт хэргийн бүлэглэлийн үйл ажиллагааг удирдан чиглүүлэх, залилан мэхлэх замаар санхүүгийн давуу талыг шударга бусаар олж авах зэрэг 39 хэрэгт буруутгаж байна.

Харин охиныг нь гэмт хэргийн орлоготой болгоомжгүй харьцсан, гэмт хэргийн бүлэглэлийн нэг хэсэг болсон зэрэг долоон хэрэгт буруутгажээ. Охины шүүх хурал нэгдүгээр сард болох бөгөөд тэр хүртэл батлан даалтад гаргаад байна.

Ээж, охин хоёр олон сая австрали долларын үнэтэй тансаг харшид амьдардаг. Тэднийг баривчлах үеэр гэрээс нь санхүүгийн баримт бичиг, гар утас, тансаг зэрэглэлийн цүнх, 10 мянган австрали доллартай тэнцэх алтан гулдмай, 6600 австрали доллартай тэнцэх казиногийн чипнүүдийг хураан авчээ. Мөрдөн байцаагчид нийт 15 сая австрали доллартай тэнцэх хөрөнгийг нь царцаажээ.