МАН дотор өрнөж буй тамганы зодооныг Удирдах зөвлөлөөс байгуулагдсан ажлын хэсгийнхэн намжаахын тулд “Хонь бүрэн, чоно цатгалан үлдэх” сценарь барьж ажиллаж байна. Ердөө хоёр хоногийн дараа МАН-ын Их хурал болно.

Эвлэрүүлэх ажлын хэсгийн ахлагч, Эдийн засаг, хөгжлийн сайд асан Ч.Хүрэлбаатарын хэлсэнчлэн УИХ-ын дарга асан, УИХ-ын гишүүн Д.Амарбаясгалан, Ерөнхий сайд Г.Занданшатар нар МАН-ын даргад нэр дэвшихгүй болсоноо албан ёсоор мэдэгдэж өрсөлдөөнөөс гарлаа.

Талууд ч тохиролцоонд хүрсэн байж мэдэхээр буй.

Учир нь, УИХ-аа УИХ-ын гишүүн Д.Амарбаясгалан, намаа Ерөнхийлөгч У.Хүрэлсүх авах, Ерөнхий сайд Г.Занданшатар танхимаа удирдан үлдэх хувилбар дээр тогтов уу гэдэг дүр зураг бууж буй.

МАН-ын даргад УИХ-ын 2024 оны сонгуульд тойрогт нэр дэвшин өрсөлдөж сонгогдсон хэд, хэдэн гишүүний нэр сонсогдсоноос хамгийн боломжит сонголт УИХ-ын гишүүн, Эдийн засаг, хөгжлийн сайд Н.Учрал гэдэг яриа өрнөж байна. УИХ-д гурав дараалан сонгогдож, Засгийн газрын танхимд ажиллаж ачаа үүрч ирсэн түүнийг намын гишүүддээ хүлээн зөвшөөрөгдөх кандидат гэж харж байгаа бололтой.

Улс төрд хөл тавьсан үеэсээ Ерөнхийлөгч У.Хүрэлсүхтэй ойр нөхөрлөж итгэл алдаагүй ганц дүү гэж тодорхойлж болно.

УИХ-ын даргын асуудлыг МАН-ын Их хурлын дараа шийдвэрлэх чиг барьсан ч УИХ-ын гишүүн Д.Амарбаясгалан талаас хүнээ тавихаар болсон гэх яриа саарал ордонд түгэж байна. Хэрвээ энэ яриа баттай бол УИХ-ын гишүүн, УИХ-ын  Аюулгүй байдал гадаад бодлогын байнгын хорооны дарга Г.Тэмүүлэн УИХ-ын дарга болох нь. Г.Тэмүүлэн гишүүний хувьд УИХ-ын 2016 оны сонгуулиас эхлэн парламентад гурав дараалан сонгогдон ажиллаж байгаа бөгөөд УИХ-ын дарга болоход чадахгүй, мэдэхгүй, туршлага дутах зүйл гарахгүй.

Өөр нэг хувилбар нь УИХ-ын гишүүн, УИХ-ын Хууль зүйн байнгын хорооны дарга Д.Цогтбаатар УИХ-ын даргад нэр нь дэвшиж мэдэхээр буй.  УИХ-д гурав дараалан сонгогдсон, дипломатч мэргэжилтэй түүнд туршлага дутах асуудал гарахгүй. Гол нь Ерөнхий сайд асан Сү.Батболдын хүн гэгддэг түүнийг УИХ-ын дарга болговол Д.Амарбаясгалан талынхан хүлээн зөвшөөрөх үү гэдэг асуудал босч ирэх юм.

Нүүрсний хулгайтай тэмцсэнийхээ төлөө намаа хагалган бутаргасан ял зэмд унаад байгаа Ерөнхий сайд Г.Занданшатарын хувьд энэ удаад намын даргын өрсөлдөөнөөс гарснаар зөвхөн танхимаа удирдах ажилд анхаарах сонголттой туллаа.

Гэхдээ түүний улс төр зөвхөн Засгийн газрыг удирдсанаар цэг тавигдахгүй 2027 оны Ерөнхийлөгчийн сонгуульд нэр дэвшин өрсөлдөх болов уу гэдэг таамаг яригдах болсон.  Хоёр жилийн дараа болох Ерөнхийлөгчийн сонгуульд нэр дэвшсэн ч, дэвшээгүй ч Засгийн газар хэр сайн ажиллахаас угтаж ирэх хоёр сонгуульд Ардын нам ард түмнээрээ ямар дүн тавиулахаа шийдүүлэх учиртай.

МАН-ын тамганы төлөө УИХ-ын гишүүн Д.Амарбаясгалан, Ерөнхий сайд Г.Занданшатар нарыг ид "зодолдож" байх үед МАН-ын даргад нэр дэвшин өрсөлдөхөө зарласан хүн бол Монголын Үндэсний худалдаа аж үйлдвэрийн танхимын ерөнхийлөгч Б.Лхагважав юм. Гэхдээ түүний энэ мэдэгдэлд Удирдах зөвлөлөөс байгуулагдсан ажлын хэсгийн ахлагч, Эдийн засаг, хөгжлийн сайд асан Ч.Хүрэлбаатар "Б.Лхагважав аа боль" гэх үгийг хандаж хэлээгүй ч МАН-ын даргад нэр дэвших хүн нь УИХ-ын 2024 оны сонгуульд тойрогт нэр дэвшин өрсөлдөж, УИХ-д сонгогдсон, намынхаа гишүүдэд хүлээн зөвшөөрөгдсөн хүн байх ёстой" гэсэн үгнээс нь харж болно.

МАН-ын Их хурал нь 2200 гаруй төлөөлөгчтэй бөгөөд Удирдах зөвлөлөөс барьж буй сценарыг дэмжих үү, тас цохин өөр хувилбар луу шилжүүлэх үү гэдгийг харахад ердөө хоёр хоног үлдлээ.

Г.ХОРОЛ