Украины Эрчим хүчний болоод Хууль зүйн сайд нар эрчим хүчний салбар дахь авлигын хэрэгтэй холбоотойгоор албан тушаалаасаа огцорлоо. Ерөнхийлөгч Зеленский Эрчим хүчний сайд Свитлана Грянчук, Хууль зүйн сайд Херман Халущенко нарыг огцруулж буйг Лхагва гаригт зарлав.

Тус улсын авлигатай тэмцэх байгууллагууд Даваа гаригт хэд хэдэн хүнийг эрчим хүчний салбарт ойролцоогоор 100 сая ам.долларын хөрөнгө завшсан схемийг зохион байгуулсан гэж буруутгасан. Үүнд үндэсний цөмийн оператор болох Энергоатомын албан тушаалтнууд мөн багтаж байна. Мөн ерөнхий сайдын орлогч асан Алексей Чернышов, Зеленскийн хуучин телевизийн студи болох "Kvartal95"-ийн хамтран эзэмшигч, бизнесмэн Тимур Миндич нар багтжээ.

ОХУ-ын арми Украины эрчим хүчний дэд бүтцэд халдсаны хариуд барьж буй бэхлэлтийн гэрээт гүйцэтгэгчдээс Хууль зүйн сайд Херман Халущенко болон бусад гол сайд, албан тушаалтнууд төлбөр авсан гэж буруутгагдаж байна.

Халущенко, Грянчук хэн хэн нь өөрсдийгөө хууль зөрчөөгүй гэж мэдэгдэж буй.

Украины Үндэсний авлигатай тэмцэх товчоо болон Авлигатай тэмцэх мэргэшсэн прокурорын газар хамтран 15 сарын турш мөрдөн байцаалт явуулсан. Энэ хүрээнд нийт 1000 цагийн аудио бичлэгийг хянан шалгасан аж. Эцэст нь засгийн газрын гишүүд болон бусад албан тушаалтан их хэмжээний мөнгө угаасныг зарлаж, бэлэн мөнгөөр дүүрсэн уутны зургийг нийтэлсэн байна.