Тухайлбал, “Эрүүл мэндийн салбарын цахимжилт ба хүний эрх, хувийн мэдээллийн эрсдэл” хэлэлцүүлэг 2025 оны арваннэгдүгээр сарын 17-ны 14:00 цагт, “Олон нийтийн сүлжээний бодлого, эрх зүйн зохицуулалт” судалгааны хэлэлцүүлэг арваннэгдүгээр сарын 27-нд, харин “И-Монголиа: Иргэний бүртгэлийн цахимжилт дахь хүний эрхийн эрсдэлийн үнэлгээ” судалгааны хэлэлцүүлэг арванхоёрдугаар сарын 2-нд тус тус болох юм.

Мөн 2025 оны арваннэгдүгээр сарын 22-ноос арванхоёрдугаар сарын 2-ны хооронд “Хүний эрх ба технологи” сэдэвт олон нийтийн хяналт, судалгааны тайлан танилцуулах, “Хүний хувийн мэдээлэл хамгаалах тухай” хуулийг сурталчлан таниулах арга хэмжээнүүдийг зохион байгуулахаар төлөвлөсөн.

Хүний хувийн мэдээлэл хамгаалах хэлтсийн дарга С.Ганзориг:

-Мэдээллийн хариуцагч байгууллагууд жил бүрийн нэгдүгээр сард ХЭҮК-т зөрчлийн бүртгэлээ хүргүүлэх үүрэгтэй ч зарим байгууллага энэ үүргээ биелүүлэхгүй байгаа нь анхаарал татаж байна.

2025 оны байдлаар бүртгэгдсэн зөрчлийг салбараар нь харвал:

• Банк, санхүүгийн салбар – 1954 тохиолдол
• Эрүүл мэндийн салбар – 798 тохиолдол
• Боловсролын салбар – 2357 тохиолдол
• Харилцаа холбоо – 5 тохиолдол

Сүүлийн үед хүнсний үйлчилгээний газрууд болон дэлгүүрүүд үйлчлүүлэгчдийн дүрс, дуу, бичлэгийг зөвшөөрөлгүйгээр цахим орчинд түгээж, хүний нэр төр, алдар хүндэд халдах тохиолдол олширсон. ХЭҮК энэ асуудлаар нийслэл, дүүргийн Хүнс, худалдаа үйлчилгээний хэлтэс болон CU, GS25 зэрэг сүлжээ дэлгүүрийн төлөөлөлтэй уулзаж, хяналтын камерын бичлэгийн ашиглалт, хадгалалт, дамжуулалттай холбоотой хууль зөрчлийн талаар хэлэлцсэн. Тухайлбал,

• Хяналтын камерын бичлэгийг олон нийтийн сүлжээнд нийтлэх, гуравдагч этгээдэд дамжуулахыг хориглох;
• Камерын бичлэгийг зөвхөн хуульд заасан зорилгоор, тухайлбал гэмт хэрэг, зөрчил шалгах үед эрх бүхий байгууллагад өгөх;
• Камер ажиллаж буйг илтгэсэн анхааруулах тэмдэг, тайлбар заавал ил байрлалд тавих;
• Иргэдийн дүрс, дуу, бичлэг зэрэг хувийн мэдээллийг зөвшөөрөлгүй түгээх нь хууль зөрчсөн үйлдэл болохыг анхааруулах.
• Хүний оролцоогүй цахим боловсруулалт хяналтгүй явагдаж болзошгүй эрсдэлтэй

ХЭҮК-аас мөн хиймэл оюун ухаан, автоматжуулсан систем ашиглан хүний оролцоогүйгээр мэдээлэл боловсруулах технологийн хөгжилтэй холбоотой хүний эрхийн эрсдэлийг судалж байна. Иргэдийн хувийн мэдээлэл нь зөвшөөрөлгүйгээр ашиглагдах, буруу зорилгоор дамжуулагдах, цахим халдлагад өртөх эрсдэл бодитой байгаа тул төр, хувийн хэвшил хариуцлагаа өндөржүүлэх шаардлагатай. ХЭҮК цаашид төрийн болон хувийн хэвшлийн байгууллагуудтай хамтран хувийн мэдээлэл хамгаалах тухай хуулийн хэрэгжилтийг сайжруулах, мэдээллийн аюулгүй байдлын хяналт, урьдчилан сэргийлэх ажлыг эрчимжүүлэхээр төлөвлөж байна.