ЗГХЭГ-ын дарга С.Бямбацогт, ЭМДС хүнд байдалд орсны цаад учир шалтгаан нь эрүүл мэндийн байгууллагын холбогдох албан тушаалтнууд хуурамч нэхэмжлэл үүсгэх замаар төсвөөс хөрөнгө завших, илүү санхүүжилт авах оролдлого хийдэг зөрчил даамжирсантай холбоотой гэж мэдэгдсэн. Тэгвэл ХСҮТ-ийн Ерөнхий захирал асан М. Адилсайхан дээрх асуудалтай холбоотой өөрийн байр суурийг илэрхийллээ. Тэрбээр, Эрүүл мэндийн даатгалын сантай холбоотой сүүлийн үед гарч байгаа мэдээлэлтэй холбоотойгоор эрүүл мэндийн салбарынхан маань бүгд хулгайч мэт нийгэмд ойлгогдож байгаа нь үнэхээр харамсалтай. Ийм байх боломжгүй. Үүнийг мэдээлэл бүртгэлийн алдаа гэж бодож байна. Магадгүй тэр олон нэхэмжлэхийг хуурамчаар үйлдсэн эмч байгаа бол хууль шүүхийн байгууллагаас шалгаад үнэн зөвийг тогтоох ёстой. Бидэнд тийм зав байхгүй. Хоёрдугаарт, Эрүүл мэндийн салбарын төсөв нь хүн амд тусламж үйлчилгээ үзүүлэхэд бодит байдал дээрээ хүрэхгүй байгаа. Бид салбарын төсвийг ДНБ-ий 6 хувьд хүргэж байж бид ард иргэдэд тусламж үйлчилгээг чанар, хүртээмжтэй хүргэнэ. Гэтэл одоо ДНБ-ий гурван хувьд хүрэх үү, үгүй юу л байна. Энэ бол бодит үнэн. Засгийн газар үүнийг маш сайн ойлгох хэрэгтэй. Өмнөх сайд Т.Мөнхсайханы бодлого үүнд л чиглэж байсан. Гуравдугаарт, Т Мөнхсайхан гишүүн 2027 оныг "Эрүүл мэндийг дэмжих жил" болгох санаачилга гаргаад Засгийн газар тогтоол гаргаж албажуулсан. Үүний цаана бодит тооцоо судалгаа байгаа. Зүгээр бодож байгаад хийгээгүй л гэж харж байна. Ер нь урьдчилан төлөвлөхгүй гэнэт шийдвэр гаргаж өнөө маргаашаа аргалах нь шийдэл биш гэв.