Хан-Уул дүүргийн нутаг дэвсгэрт өнгөрөгч сард Мэргэжлийн хяналтын ерөнхий газрын лабораторийн барилгыг барьж байсан БНХАУ-ын зургаан ажилтан манай улсын цагдаагийн хоёр ажилтныг зодож гэмтээсэн гэх хэрэгт хуулийн байгууллагад сэжигтнээр татагдсан. Албаны эх сурвалжийн мэдээллээр Хан-Уул дүүргийн цагдаагийн хэлтсээс тэдэнд дээр нэмж дахин гурван хятад иргэнийг цагдан хорьсон байна. Уг хэргийг үйлдсэн БНХАУ-ын иргэдэд Эрүүгийн хуулийн 181.3 буюу танхайрах, 230.2 буюу Төрийн алба хаагч, хэв журмын олон нийтийн байцаагчийг эсэргүүцсэн гэх үндэслэлээр хэрэг үүсгэсэн бөгөөд мөрдөн байцаах ажиллагаа үргэлжилж буй гэнэ.
Н.Түвшин