УИХ-ын гишүүн Д.Энхтуяа, Б.Пунсалмаа, С.Одонтуяа нар ахмад настны тэтгэврийн асуудлаар өнөөдөр /2025.11.12/ мэдээлэл хийлээ.

УИХ-ын гишүүн Д.Энхтуяа:

-Дараа оны төсөв батлагдах гэж байна. Тиймээс төсөвтэй холбоотой асуудлууд гарч байна. Тухайлбал цалин, тэтгэвэр тэтгэмжтэй холбоотой гомдол санал их байна. Төсөв хэлэлцүүлж эхэлснээс хойш ахмадууд хүчтэй тэмцэл өрнүүлж эхэлсэн. Ардчилсан намын эмэгтэй гишүүд ахмадын тэтгэвэр тэтгэмжийг нэмэх тал дээр дуу хоолой болж ирсэн. Анхны төсвийн төсөл дээр тэтгэвэр тэтгэмжийг зургаан хувь нэмэгдүүлэх гэж байсан. Бид санал хүсэлтээ илэрхийлсний үндсэн дээр инфляцтай уядуулж ахмадын тэтгэврийг нэмэх гэсэн заалтыг үндэслэн 8.6 хувиар нэмэх болсон. Халамжийн төвөөс өгсөн тоо баримтыг танилцуулъя.

Нийт тэтгэвэр авч байгаа 412 мянган ахмад байгаа. Үүнээс 572 мянган төгрөгийн тэтгэвэр авдаг 32550 ахмад, 571-688 мянган төгрөгийн тэтгэвэр авдаг 2649 ахмад, 689 мянган төгрөгийн тэтгэвэр авдаг 205160 ахмад, 689 мянгаас нэг сая төгрөгийн тэтгэвэр авдаг 80498 ахмад, нэг саяас нэг сая 500 мянган төгрөгийн тэтгэвэр авдаг 66904 ахмад, нэг сая 500 мянгаас хоёр сая төгрөгийн тэтгэвэр авдаг 16012 ахмад, хоёр саяас гурван сая төгрөгийн тэтгэвэр авдаг 8178 ахмад, гурван саяас дээш 1040 ахмад байна. Энэ тоон мэдээллээс ажиглавал, нийт ахмадын 50 орчим хувь нь тэтгэврийн доод хэмжээг авч, 93 хувь нь нэг сая таван зуун мянгаас доош тэтгэвэр авч байна.

Жагсаж, тэмцэл өрнүүлж байгаа ахмадууд тэтгэврийн доод хэмжээг “нэг сая 500 мянган төгрөг болгож өгвөл дундаж амьдарч болохоор байна” гэдэг саналыг УИХ болон Засгийн газрын гишүүдэд илэрхийлсэн. Одоо батлагдах төсвөөр найман хувь нэмэх нь тодорхой болсон. Энэ нь тэтгэврийн доод хэмжээ болох 572 мянган төгрөг авдаг ахмадын тэтгэвэр 45 мянган төгрөг нэмэгдэнэ. Энэ нэмэгдэл бодит нэмэгдэл болж чадахгүй. Тиймээс бид дараагийн алхам юу байх ёстой талаар бодож байна. Ахмадуудынхаа тэмцлийг үр дүнтэй болгохыг хүсэж байгаа учраас Засгийн газарт саналаа өгөх гэж байгаа.

УИХ-ын гишүүн Б.Пунсалмаа:

-Төсвийн тухай хууль батлах гэж байна. Анх зургадугаар сараас эхлэн тэтгэвэр тэтгэмжээ нэмэгдүүлэх санал гаргасан. Одоо өвлийн саруудтай золгох гэж байна. Бага тэтгэвэр авч байгаа ахмадууд энэ нэмэгдэл нь хаанаа ч хүрэхгүй байна. 600 мянган төгрөг авч байгаа ахмадууд гурил, будаа, түлээ нүүрсээ яаж бэлдэх билээ. Ахмадууд “Бид нар өлсгөлөн зарлахгүй ээ, бид угаасаа өлсөж байна” гэж ярьж байсан. Үнэхээр бид ахмадуудыгаа туйлдааж байна. Нийгмийн даатгалын сангаас олгох тэтгэврийн тухай хуулийн 27.1-т Жил бүрийн инфляцын түшингээс хамаарч нэмэгдүүлнэ гэсэн заалт байгаа. Өнөөгийн нөхцөл байдлыг бодолцож уян хатан байдлаар нэмэгдүүлэх шаардлагатай.

УИХ-ын гишүүн С.Одонтуяа:

-Монгол улсын төсөвт тэтгэврийг 8.6 хувиар нэмэхээр тусгасан. Энэ нь бага тэтгэвэртэй ахмадуудын тэтгэвэр 30-40 мянган төгрөгөөр нэмэгдэх юм. Тэтгэвэр тэтгэмжийн сангаас олгох тухай хуулийн 27.1-т заасны дагуу төсөвт зохицуулалт хийх эрх нь Засгийн газарт байгаа. Бага тэтгэвэртэй ахмадын тэтгэврийг төсөвт тогтоосон хэмжээнээс тодорхой хэмжээгээр нэмэгдүүлэх боломж байна. Ядуурлыг буруулах талаар Ерөнхий сайд ярьж байсан. Ядууралд өртөж байгаа хүмүүс бол бага тэтгэвэр авагчид ядуурлыг бууруулах гол цэг чинь энд байна. Хэрвээ ядуурлыг бууруулъя гэвэл бага тэтгэвэр авч байгаа ахмадуудын амьжиргааг дэмжих хэрэгтэй. Хүнсний багц үнэ гэхэд л арван сарын хугацаанд 14.1 хувиар өссөн байна. Ийм өндөр үнийн өсөлттэй үед ахмадуудын тэтгэвэр хаанаа ч хүрэхгүй байна.

Н.Цолмонбаатар