АНУ-ыг тольдох Тайвань

Тайванийн засгийн газар агаарын довтолгооноос хамгаалах хүчин чадлаа нэмэгдүүлэх хүчин чармайлт дор шинэ системд хөрөнгө оруулалт хийж байна. Тодруулбал, Тайвань "Т-Dome" нэртэй агаарын довтолгооноос хамгаалах системтэй болжээ. Энэ нь өндөр хүчтэй зэвсгээс үүдэлтэй аюул заналхийллийг эсэргүүцэх зориулалттай. "Т-Dome"-ийн эрт сэрэмжлүүлгийн систем нь пуужинг зогсоох боломжийг олгодог бөгөөд дунд болон нам өндөрт нисгэгчгүй онгоцны дайралтаас хамгаалдаг.

ПУУЖИНГИЙН АЖИЛЛАГААНЫ ҮР АШГИЙГ САЙЖРУУЛАХ ХЭРЭГТЭЙ

Игараши Такаюки бол Батлан хамгаалах судалгааны үндэсний хүрээлэнгийн судлаач бөгөөд Хятад, Тайванийн цэргийн хүчин чадлын талаар судалдаг. Тэрбээр "NHK World"-д өгсөн ярилцлагадаа "T-Dome" нь Тайванийн давуу талуудад тулгуурласан бат бөх, олон давхаргат төлөвлөгөө гэж хэлсэн байна. Тайвань 1970-аад оноос хойш агаарын довтолгооноос хамгаалах пуужингаа хөгжүүлж байгаа. Гэсэн хэдий ч хүчин чадал нь асуудал үүсгэж болзошгүйг Игараши онцолжээ. Тэрбээр хэлэхдээ,"Тайванийн пуужингийн системийн хөгжүүлэлтэд хэмнэлт, илүү үр ашигтай ажиллагаа дутагдсан хэвээр байна. Иймд пуужинг ажиллуулах үр ашигтай системийг бий болгох хэрэгтэй" гэжээ.

Игараши "T-Dome"-ийг ерөнхийлөгч Дональд Трампын засаг захиргааны санал болгосон "Америкийн Алтан Дом"-ын Тайванийн хувилбар гэж тодорхойлсон.

Учир нь Тайвань зохион байгуулалттайгаар АНУ-тай төстэй байдлаа онцлохыг хичээж байна гэж Игараши үзэж байна. "Тайвань Америкийн Алтан Домтэй төстэй уриа лоозон ашигласнаар Вашингтонтой харилцах харилцаагаа онцолж байна. Энэ нь АНУ-аас илүү их дэмжлэг авах арга зам бөгөөд мөн хүчтэй стратегийн мессеж илгээдэг" гэжээ.

АЛТАН ДОМ

Трамп тавдугаар сард Алтан Дом төлөвлөгөөг зарласан. Тэрбээр үүнийг эх газрыг хамгаалах дараагийн үеийн пуужингийн довтолгооноос хамгаалах төлөвлөгөө гэж тодорхойлжээ. Трамп тухайн үедээ "Рональд Рейган олон жилийн өмнө хүсч байсан ч тэдэнд технологи байгаагүй. Гэхдээ энэ бол бидний авч чадах, авах ёстой зүйл. Бид үүнийг хамгийн өндөр түвшинд бий болгох болно" гэж Алтан Домийн тухай хэлсэн байдаг. Түүний хувьд сансарт пуужинг дайран өнгөрөх чадвартай систем хүсч байсан юм. Тиймдээ ч 175 тэрбум ам.долларын өртөгтэй Алтан Домийг 2029 онд бүрэн эрхийн хугацаа нь дуусахаасаа өмнө ашиглалтад оруулахыг зорьж байна.

Игараши Алтан Домийг танилцуулсан нь энгийн нэг тохиолдол биш гэж хэлжээ. АНУ ч бас агаарын довтолгооноос хамгаалах системээ бэхжүүлэхийг хүсч байна. Энэ нь Бээжин сүүлийн жилүүдэд улам бүр хүчин чадлаа нэмэгдүүлж, эрчимжиж байгаатай холбоотой. Аравдугаар сарын дундуур Хятадын контейнер хөлөг онгоц Хойд мөсөн далайгаар зорчсоны дараа Европт ирсэн. Энэ нь Хятадын контейнер хөлөг онгоц анх удаа "Мөсөн торгоны зам" гэж нэрлэгддэг замыг туулсан явдал байв.

Энэхүү замыг ашиглах нь Хятад улсын хувьд худалдааны замыг хамгаалах нэр дор цэргийн хөлөг онгоцоо Берингийн тэнгис рүү илгээх боломж юм.

Мөн Хятадын тэнгисийн цэргийг Америкийн эрэг рүү хүргэх замыг нээж өгсөн гарц байсан. Хэрэв ирээдүйд дайн гарах юм бол Мөсөн торгоны зам нь АНУ-ын эх газар руу баллистик пуужингаар цохилт өгөх гарцыг Хятадад олгож байгаа гэж Игараши үзэж байна. "Тиймээс АНУ Хятадын шумбагч онгоц болон Оросын пуужингаас өөрсдийгөө хамгаалахын тул Алтан Домийг бэлтгэж байна" гэж тэрбээр онцолжээ.

ОЛОН УЛСЫН ХАМТЫН АЖИЛЛАГАА ЧУХАЛ

Накасоне Энхтайвангийн хүрээлэнгийн ахлах судалгааны зөвлөх бөгөөд Японы батлан хамгаалах чадавхын мэргэжилтэн Нагашима Жун хэлэхдээ, улс орнууд агаарын довтолгооноос хамгаалах системээ бэхжүүлэх хандлагатай байгаа тул Токио мөн адил энэ чиглэлээр илүү их арга хэмжээ авах шаардлагатай гэжээ. Тэрбээр "Бид бүрэн гүйцэд, илүү үр дүнтэй системийг хурдан бүтээх хэрэгтэй. Энд гол асуудал бол цаг хугацаа, боловсон хүчин буюу системийг хөгжүүлэх хүмүүс болон технологийн төсөв шаардлагатай юм. Эдгээр гурван хүчин зүйл чухал гэж би бодож байна" гэж хэлсэн байна.

Түүний хувьд төр, хувийн хэвшлийн хамтын ажиллагаа гол түлхүүр байх боловч ганц улс орон өөрөө төгс агаарын довтолгооноос хамгаалах системийг хөгжүүлэхэд хэцүү байх болно.

АНУ, Европ хүртэл агаарын довтолгооноос хамгаалах систем, төлөвлөгөөг бий болгохдоо холбоотон, түншүүдтэйгээ хэлэлцдэг. Тиймээс ямар ч тохиолдолд улс орнууд агаарын орон зайгаа аюулгүй байлгаж, хамгаалахын тулд олон улсын хамтын ажиллагааг чухалчлах хэрэгтэй гэж Нагашима үзжээ.

ЭХ СУРВАЛЖ: NHK