Өмнөд Солонгос улсад жил бүр зохион байгуулагддаг Коллежид суралцах чадварын шалгалт Пүрэв гаригт /2025.11.13/ эхэлж байна. Шалгалтыг өглөөний 08:40 цагаас оройн 17:45 цагийн хооронд улс орон даяар 1310 байршилд авна. Энэ жил өнгөрсөн оноос зургаан хувиар их буюу 550 мянга гаруй хүн шалгалт өгөх аж. Өргөдөл гаргагчдын тоо сүүлийн долоон жилийн хамгийн дээд хэмжээнд хүрээд буйг тус улсын Боловсролын яам онцоллоо.

Нийт өргөдөл гаргагчдын 67.1 хувь нь дөнгөж ахлах сургуулиа төгссөн хүүхдүүд байгаа бол 28.9 хувь нь хоёр ба түүнээс дээших удаагаа шалгалт өгч буй хуучин төгсөгчид юм.

Шалгалт өгөх хүмүүсийн тоо огцом нэмэгдсэн нь алтан гахай жилтэй холбоотой гэдгийг яамны албан тушаалтнууд хэлж байна. Тодруулбал, 2007 оны алтан гахай жилд төрөлт ер бусын ихээр нэмэгджээ.

Коллежид суралцах чадварын шалгалт нь сурагчдын олон жилийн шаргуу хөдөлмөрийн үр дүн юм. Улсаас энэхүү шалгалтад асар их ач холбогдол өгдөг. Тийм ч учраас энэ өдөр нийтийн тээврийн тоог нэмэгдүүлэх, дуу чимээг багасгахын тулд англи хэлний сонсголын шалгалтын үеэр нислэгүүдийг хориглох зэрэг арга хэмжээ авдаг.