Монгол Улсын Хөгжлийн банкны гүйцэтгэх захирлаас З.Нарантуяаг чөлөөлжээ. Тэрбээр 2024 оны арваннэгдүгээр сарын 7-нд тус банкны гүйцэтгэх захирлаар томилогдож байсан юм.

Монгол Улсын Хөгжлийн банкны Төлөөлөн Удирдах Зөвлөлийн шийдвэрээр дээрх томилгоо хийгдэж байсан бол жилийн дараа чөлөөлөгдлөө. Түүний тус банкийг удирдаж байхдаа хийсэн том ажлын нэг нь Монгол Улсын Хөгжлийн банк нь өнгөрсөн зургадугаар сард олон улсын хөрөнгийн зах зээлд 350 сая ам.долларын бондыг амжилттай арилжсан. Гурван жилийн хугацаатай, 8.5 хувийн тогтмол хүүтэй энэхүү бондыг Австрийн Венийн хөрөнгийн биржид бүртгэсэн байдаг. Уг хэлцэлд дэлхийд тэргүүлэгч хөрөнгө оруулалтын банк болох J.P. Morgan, HSBC хамтран ажиллаж, олон улсын томоохон хөрөнгө оруулагч оролцсон нь Хөгжлийн банкны шинэчлэл өөрчлөлт, засаглал, үйл ажиллагаа болон зээлжих чадварт итгэж байгааг бататгалаа гэж онцолж байв. Хөгжлийн банк энэхүү урт хугацаат эх үүсвэрийг гадаад өрийн удирдлагыг үр ашигтайгаар хэрэгжүүлэх, хөгжлийн шинэ төслүүдийг санхүүжүүлэх үндсэн зорилгоор ашиглана. Уг санхүүжилт нь улсын гадаад валютын албан нөөцийг нэмэгдүүлэх, банкны урт хугацаат эх үүсвэрийн бүтцийг сайжруулах, цаашлаад стратегийн ач холбогдол бүхий хөгжлийн төслүүдийг тогтвортой эх үүсвэрээр хангах суурь боломжийг бүрдүүлж байгаа юм гэж тодотгож байсан удаатай. Мөн Монгол Улсын Хөгжлийн банкны дүрмийн санг нэмэх шаардлага үүссэн ч Засгийн газрын өнгөрсөн дөрөвдүгээр сард гаргасан шийдвэр хэрэгжихгүй сунжирч байна гэдгийг ч шүүмжилж байв.

Г.ХОРОЛ