Японы ерөнхий сайд Санаэ Такаичи өнгөрсөн Баасан гаригт Японы парламентад үг хэлэхдээ Хятад улс Тайванийг заналхийлж, цэргийн ажиллагаа нь амьд үлдэхийн төлөөх аргагүй тэмцлийг үүсгэвэл Япон хөндлөнгөөс оролцохоос өөр аргагүй гэж хэлжээ.

Үүний хариуд Хятадын Осака дахь ерөнхий консул Шюэ Жиан хатуу ширүүн үгээр Такаичиг заналхийлэв. Тэрбээр "Х" хаягаараа огтхон ч эргэлзэхгүйгээр түүний толгойг тасдана гэж жиргэжээ. Мөн "Та үүнд бэлэн үү?" гэж бичээд ууртай эможи хавсаргажээ.

Шюэ Жиан энэ асуудлаар бусад хүний бичсэн хэд хэдэн сэтгэгдлийг ч өөрийн хаягаараа хуваалцсан байна. "Хэрвээ Япон улс Хятадад халдвал тэр даруй хариу довтолгооныг өдүүлэх болно", "Хатагтай Такаичи дайн өдүүлэх талаар юу ч болоогүй юм шиг ярьж байгаа бол энэ улс дууслаа гэсэн үг" гэх зэрэг сэтгэгдэл үүнд багтжээ.

Японы засгийн газрын хэвлэлийн төлөөлөгч Минорү Кихара Хятадын консулын заналхийллийг "туйлын зохисгүй" гэж тодорхойлжээ. Түүний хэлснээр Японы Гадаад хэргийн яам болон Хятад дахь Японы Элчин сайдын яам энэ асуудал дээр эсэргүүцлээ илэрхийлж, "Х" дээрх нийтлэлийг устгуулахыг хүссэн байна. Хятадын Осака дахь ерөнхий консул Шюэ Жианы нийтлэл ч удалгүй устжээ.

Хятад улс Такаичигийн хэлсэн үгийг ноцтой хүлээж авч, эсэргүүцэж буйг Бээжингийн Гадаад хэргийн яамны хэвлэлийн төлөөлөгч Лиж Жиан Даваа гаригт мэдэгдэв. Японы албан тушаалтнууд Хятад, Тайванийн харилцаанд хөндлөнгөөс оролцох нь Токио, Бээжингийн харилцаанд ихээхэн сөргөөр нөлөөлнө гэдгийг мөн сануулжээ.

Энэ бүх харилцан сануулгын дараа Санаэ Такаичи байр сууриндаа хөдөлшгүй байгаа гэдгээ Даваа гаригт /2025.11.10/ дахин тодотгожээ. Тэрбээр "Би зарим боломжит хувилбарыг дурдсан. Гэхдээ тухайн нөхцөл байдал нь аюултай эсэх дүгнэлтийг засгийн газар гаргана" гэжээ.

Японы ихэнх удирдагч Хятадтай сөргөөцөлдөхөөс зайлсхийхээр ирсэн. Нөгөөтэйгүүр, Япон бол Тайванийн хамгийн ойрын хөршүүдийн нэг. Япон болон Тайванийн хамгийн ойр арлууд нь хоорондоо 120 км хүрэхгүй зайтай. Мөн АНУ-ын 50 мянга гаруй цэрэг Японд байрладаг бөгөөд тэдгээр цэргийг Тайванийг хамгаалах зорилготой жадны үзүүр гэж шинжээчид нэрлэдэг.