Замын хөдөлгөөний удирдлагын төв, Тээврийн цагдаагийн алба хамтран өнгөрсөн есдүгээр сард иргэд зөрчлийн мэдээллийг илгээж, хяналт тавих боломжтой “102 Police” аппликейшныг хэрэглээнд нэвтрүүлсэн. Тус аппликэйшнаар дамжуулан иргэд, явган хүний зам дээр болон автобусны зогсоол дээр, удаан зогсож болохгүй гэсэн тэмдэглэгээтэй газар тээврийн хэрэгслээ байршуулсан зөрчлийг ТЦА-нд мэдээлэх боломжтой аж. Ингэснээр тухайн жолоочид ногдуулсан торгуулийн 10-20 хувийг иргэд урамшуулал хэлбэрээр авах юм. Уг зохицуулалт энэ сарын 1-нээс хэрэгжиж эхэлсэн. Тэгвэл өнөөдрийн байдлаар хэчнээн иргэн “102 Police” аппликэйшнд зөрчил мэдээлэл илгээж буй талаар “Замын хөдөлгөөний удирдлагын төв” ОНӨТҮГ-ын захирал Ч.Хувьзаяагаас тодрууллаа.

Тэрбээр, "Замын хөдөлгөөний удирдлагын төв хяналтын камер болон зурган мэдээлэл дээр тулгуурлан эрх бүхий албан тушаалтнаар баталгаажуулсны хүрээнд иргэдийн "102 Police" аппликейшнд илгээсэн зөрчилд торгууль ноогдуулж ажиллаж байна. Тухайлбал, 2025 оны арваннэгдүгээр сарын 9-ний байдлаар "102 Police" аппликейшныг 156 мянган хэрэглэгч татаж замын хөдөлгөөний зөрчил мэдээллийг илгээж байна. Нөгөөтэйгүүр урамшуулалтай болсон /2025.11.01/ өдрөөс хойш нийт 53 мянган зөрчлийг иргэд тус аппликэйшнаар дамжуулан илгээсэн.

Илгээсэн зөрчлийн мэдээллийг энэ сарын 5-ны өдрийг хүртэл нийт 17.894 зөрчлийг хяналтын камер болон албан тушаалтнаар баталгаажуулсан. Иргэд өдөрт 6000-7000 зөрчлийг 102 аппликейшн руу илгээж байна.

Үүнээс гадна зөрчил илгээсэн иргэд торгуулийн 10-20 хувийн урамшууллыг улирал бүрийн 20-ны өдөр олгох төлөвтэй байгаа. Гэхдээ тухайн иргэний илгээсэн зөрчлийн мэдээлэл баталгаажиж, зөрчил гаргасан тээврийн хэрэгсэл торгуулиа бүрэн барагдуулсан нөхцөлд иргэдэд 20 хувийн урамшуулал орно гэж ойлгож болно.

Түүнчлэн Зөрчлийн тухай хууль, Хуул зүй, дотоод хэргийг сайд болон прокурор хамтарсан журам батлагдсан байдаг. Тэрхүү журамд тээврийн хэрэгсэл замын хөдөлгөөний дүрэм зөрчиж торгуулсан тохиолдолд төлбөрийг сарын хугацаанд төлөхгүй тохиолдолд 10 хувь нэмж тооцно гэж журамд тусгасан байдаг. Тус журмын дагуу 15 хоногт торгууль төлж барагдуулсан бол 50 хувийн торгууль, 15 хоногоос дээш хугацаанд 10 хувь нэмэгдэж бодогдох бөгөөд нийт таван сарын хугацаанд 10 хувь  тус тус нэмэгдэнэ" гэлээ.

Гэмт хэргээс урьдчилан сэргийлэх тухай хуулийн 34 дүгээр зүйлд гэмт хэрэг, зөрчлөөс урьдчилан сэргийлэх ажилд идэвхтэй оролцсон иргэн, хуулийн этгээдийг 20 хүртэлх хувиар урамшуулж болохыг заасан байдаг. Мөн Нийслэлийн иргэдийн Төлөөлөгчдийн Хурлын 24/34 дугаар тогтоол батлагдсаны дагуу зөрчил илгээсэн иргэнд урамшуулал олгох журмыг хэрэгжүүлэх, 102 аппликэйшнийг хэрэглэхэд хялбар болгохыг НИТХ-ын дарга А.Баяр үүрэг болгосон байдаг.