УИХ-ын гишүүн Б.Найдалаагаас цаг үеийн асуудлаар дараах тодруулгыг хийлээ.

-Эмч нар цалингаа нэмэгдүүлэх шаардлага тавьж, ажил хаяхаа мэдэгдлээ. УИХ-аар 2026 оны төсвийн хуулийг хэлэлцэх шатанд эрүүл мэндийн салбарынхны цалинг 15-аас дээш хувиар нэмэх боломж байгаагүй юу?

-Эрүүл мэндийн даатгалын сан буюу санхүүгийн тогтолцоог нь шинэчлэхгүйгээр эмчийн цалинг нэмэх боломжгүй. Эрүүл мэндийн сайд Ж.Чинбүрэн ХҮН намын зөвлөлд энэ асуудлаар танилцуулсан. Хүний хөгжил байнгын хорооны хувьд салбарын сайд болон бусад мэргэжилтнүүдтэй ярилцлага хийсэн. Эрүүл мэндийн сайд даатгалын санг удирдах нь өөрөө байж болохгүй зүйл. Санхүү үр ашигтай байхын тулд хараат бус, бие даасан байх ёстой. Нэг хүн жилд 300 гаруй удаа эмнэлэгт үзүүлсэн тухай зарим сайд нар мэдээлэл өгсөн. Тэр бол яагаад ч энгийн үзэгдэл биш. Ямар нэгэн байдлаар ашиглан буюу худлаа бичилт хийсэн эсвэл хэтрүүлэн бичсэн байгаа. Өдөр болгон эмнэлэгт үзүүлээд явдаг хүн гэж байхгүй. Энэ бол цаанаа хулгайн юм уу, ашгийн шинж чанар байна. Хяналтыг сайжруулахын тулд хуулийн өөрчлөлт оруулж, цахимжуулах ёстой. Эмнэлгийн удирдлагыг хэн нэгэн дээрээс томилдог байдлаа зогсоох ёстой.

–Эрүүл мэндийн даатгалын сангийн болон салбарын тогтолцоог нэгтгэж сайжруулах талаар яригдсан зүйл байна уу?

-Онцолж хэлэх зүйл гэвэл одоогийн эрүүл мэндийн даатгалын тогтолцоо бол муу биш. Эмнэлгийн менежментийг халах том шинэчлэлт л хэрэгтэй байгаа. Эмнэлэг гүйцэтгэлийн үнэлгээгээр хэрэгтэй хэрэггүй нь хамаагүй даатгалын сангаас нэхэмжилж дампууруулдаг байж болохгүй. Саяхан боловсролын салбарынхан цалингаа нэмүүлэхийн тулд жагсаал хийсэн. Ямар нэг бодлогын үйлдэл хийгээгүй болохоор  аргагүй байдалд орооднэмж байгаа. Энэ бол буруу арга. Хэрвээ бид сангаа шинэчилчихвэл эмнэлгийн дарга нь, эрүүл мэндийн салбар нь  өөрөө ажиллаж байгаа эмч нарын цалинг нэмэх боломжтой болно.

Н.ЦОЛМОНБААТАР