Үндэсний аудитын газар 2025 оны гуравдугаар сарын 25-нд Хүүхэд, гэр бүлийн хөгжил, хамгааллын ерөнхий газрын 2024 оны санхүүгийн нэгтгэсэн тайлан, төсвийн гүйцэтгэлд аудит хийж, хязгаарлалттай дүгнэлт гаргасан байна.

Аудитын багийн дүгнэлтэд дурдсанаар, тус газрын 2024 оны санхүүгийн тайлан нь ерөнхийдөө үнэн зөв боловч тодорхой зөрчил, алдаа илэрсэн тул “хязгаарлалттай дүгнэлт” өгчээ. Тодруулбал, батлагдаагүй нэмэлт санхүүжилтийн дансанд нийт 1.57 тэрбум төгрөг төвлөрүүлж, зарцуулсан, мөн харьяа байгууллагуудын 913.4 сая төгрөгийн зардлыг Ерөнхий газрын төсвөөс хууль бусаар санхүүжүүлсэн зэрэг зөрчил илэрчээ.

Мөн 315.6 сая төгрөгийн үндсэн хөрөнгө, 107 сая төгрөгийн бараа материалын тооллого хийгдээгүй, батлагдаагүй орон тоонд 18 хүн ажиллуулж, 420 сая төгрөгийн цалин, шимтгэл олгосон, 316.1 сая төгрөгийн бараа материал буруу ангилалтай бүртгэгдсэн зэрэг алдаа илэрчээ. Түүнчлэн 270.9 сая төгрөгийн гүйлгээнд анхан шатны баримт дутуу, нотолгоо бүрдээгүй байсан зэргийг аудитын тайланд дурдсан байна.

Аудитын дүнгээс харахад тус газрын 2024 оны нийт орлого 12.7 тэрбум төгрөгт хүрсэн бөгөөд үүний 6.97 тэрбумыг дээд шатны төсвийн хуваарилалт, 3.43 тэрбумыг Засгийн газрын болон Засаг даргын нөөц хөрөнгийн сангаас, 352.6 сая төгрөгийг хандив, тусламжаас бүрдүүлжээ. Харин нийт зарцуулсан дүн нь 12.13 тэрбум төгрөг байсан бөгөөд үлдсэн 534.3 сая төгрөгийг төсөвт буцаан төвлөрүүлсэн байна.

Онцлох ажлуудаас дурдвал, “Олон улсын найрамдал цогцолбор”-ын их засварын ажилд 6.2 тэрбум төгрөг, “Өнөр бүл” хүүхдийн төвийн хөрөнгө оруулалтад 1.7 тэрбум төгрөгийн зардал гаргажээ. Мөн 2024 онд батлагдсан “Хүүхэд хамгааллын тухай хууль”-ийн хэрэгжилтийн хүрээнд сургалт, сурталчилгаа, стандарт боловсруулах зэрэг ажилд нийт 225.2 сая төгрөг зарцуулсан байна.

Аудитын байгууллагаас дүгнэхдээ, Хүүхэд, гэр бүлийн хөгжил, хамгааллын ерөнхий газрын 2024 оны санхүүгийн тайлан үндсэндээ үнэн зөв боловч зарим орлого, зарцуулалт, хөрөнгийн бүртгэл, тооллого, баримтын бүрдэл, баталгаажуулалт хангалтгүй байгаа нь санхүүгийн сахилга, хяналт, дотоод аудитын тогтолцоо сул байгааг харуулж байна гэжээ.