Францын ерөнхийлөгчөөр 2007-2012 оны хооронд ажиллаж байсан Николас Саркози Ливийн удирдагч асан Муаммар Каддафийн мөнгөөр 2007 оны сонгуулийнхаа кампанит ажлыг хууль бусаар санхүүжүүлэхийг оролдсон хэргээр таван жилийн хорих ял авсан билээ. Тэгвэл Саркози ердөө 20 хоног хоригдсоны эцэст суллагдаж магадгүй болоод байна. Парисын шүүх түүнийг суллах эсэхийг өнөөдөр /2025.11.10/ шийднэ.

Тодруулбал, Саркозигийн хуулийн баг давж заалдаж, түүнийг хугацаанаас нь өмнө суллуулах хүсэлт гаргасан. Давж заалдах шатны шүүх хурлыг ирэх хавар хийж магадгүй байна.

70 настай Саркози орчин цагийн Францын ерөнхийлөгч нарын дундаас шоронд хоригдсон анхны эрхэм болоод буй. Шорон руу хүргэгдэхээсээ өмнө тэрбээр "Үнэн ялна гэдэгт эргэлзэхгүй байна. Гэхдээ төлөх үнэ нь хэтэрхий өндөр байна" гэж цахим хуудсандаа бичжээ. Тэрбээр өөрт нь оноосон ялыг улс төрийн зорилготой гэж үзэж байгаа тул давж заалдахаар анхнаасаа төлөвлөж байв.