“Ахмадын дуу хоолой хөдөлгөөн”-өөс тэтгэврийн хэмжээг нэмэгдүүлэх шаардлага тавьж, өнөөдөр (2025.11.10) “Үндэсний мэдээллийн төв”-д мэдээлэл хийв.

Ахмадын дуу хоолой хөдөлгөөний гишүүн: “Бидний  шаардлага бол маш тодорхой. Тэтгэврийн доод хэмжээг 1.5 сая төгрөгт хүргэх, тэтгэврийн зээлийг нэг удаад 36 сарын хугацаатай олгох, тэтгэврийн зээлийн хүүг бууруулж 12 хувь  болгох, тэтгэврийн зээлийг хэрэглээний зээлийн ангиллаас гаргах, 690 тэрбумаа тэгш хуваарил, тэтгэврийн зээлийн хүүг багасга гэх шаардлагуудыг тавьж байна. Эдгээр шаардлагыг хүлээн авч 72 цагийн дотор шийдвэрлэ. Төр засаг хариуцлага хүлээх ёстой. Бид  зах зээлд шилжих хүртэл нэгдэл нийгэмд хоёргүй сэтгэлээр зүтгэж аль ч салбарт залуу насаа зориулсан. Зүгээр сууж байгаад энэ тэтгэврийг аваагүй.

Ахмадууд  тэсэхийн төлөө биш амьдрахын төлөө тэмцэж байна.  Амьдрал тоглоом биш. Та бүгд айл гэр бүлж тоглоогүй. Залуучууд нь өдөр шөнөгүй ажиллаж байгаа ч өр зээлдээ баригдсаар л байна.

Ахмадууд нь цөхөрч байна, ядарч байна, туйлдаж байна, зовж байна. Бид тэвчсэн, хүлээсэн. Одоо хязгаартаа тулж байна.

Хөгжлийн бэрхшээлтэй иргэд ч гэсэн халамж хүртэх эрхтэй. Гэтэл УИХ-ын гишүүн  Ж.Батсуурь “ хоолны сав,  сард 21 мянган төгрөгөөр ч амьдрах боломжтой” гэж ярьж байсан. Хөгжлийн бэрхшээлтэй иргэдээс уучлалт гуйгаарай. Төр нь төр шиг бай. УИХ, ЗГ нь ёс зүйтэй байж хариуцлагаа хүлээж шийдвэрээ хурдан гарга. Ахмадууд чөтгөрийн тойрогт орчихсон байгаа. Үүнийг төр засаг л шийдэх ёстой.  Тэтгэврийн доод хэмжээг 1.5 сая төгрөгт хүргэхийг шаардаж байна. Чимээгүй суулт өдөр бүр хүрээгээ тэлсээр орон даяар суулт хийж байна. Улаанбаатар хот, Орхон, Хөвсгөл аймаг, Сүхбаатар аймгийн Эрдэнэцагаан, Говьсүмбэр аймгийн Шивээговь, Төв аймгийн Батсүмбэр, Сэлэнгэ аймгийн Мандал сум, Түнхэл тосгон, Төв аймгийн Баянчандмань зэрэг аймаг сумдын ахмад нэгдэн суулт хийж байгаа.

Өнгөрсөн долоо хоногийн баасан гарагт Төрийн ордны баруун хаалган дээр 126 маникан аваачиж тавьсан байна. Үүнийг биднийг зохион байгуулсан мэтээр ярьсан. Бид ёс зүйтэй, ухамсартай хүмүүс учраас тийм гаж буруу үйлдэл гаргахгүй.

Харин бидний нэрийг барихаа болиорой. Ахмадын дуу хоолой хөдөлгөөн бол чимээгүй л суулт хийж байгаа” гэв.

Увс аймгийн харьяат ахмад: “Ахмадын чимээгүй суултад оролцохоор Увс аймгаас ирлээ. Улсынхаа сан хөмрөг, эдийн засгийг гамналгүй л яах вэ. Гэхдээ ахмадуудын тэтгэврийг 20-50 хувь нэмэгдүүлэх шаардлага байна.  Ёс зүйтэй баймаар байна. УИХ гишүүд ард түмнээс сонгогдсон хэр нь яагаад бидний төлөө дугарахгүй байна вэ. Бид гомдолтой байна. Ахмадын амьдралд тэтгэвэр, тэтгэмж яагаад ч хүрэлцэхгүй байна. Хүйтэн болж байна. Дараа ондоо мэнд ормоор байна. Амьдралд нь тэтгэвэр нь хүрэлцэхгүй байгаа ахмадуудад 36 сараар тэтгэврийн зээл олговол хавар хүртэл хөлдчихгүй л байх.  Ерөнхий сайд Г.Занданшатар зөв шийдвэр гаргах хэрэгтэй. Тэтгэврийн мөнгийг нэн яаралтай зээлээр ч болтугай нэмэгдүүлэх ёстой” гэлээ.

Н.ЦОЛМОНБААТАР