Өмнөд Солонгос улс Хойд Солонгосын согтууруулах ундааг импортлох гаалийн дүрмийг шинэчлэхээр ажиллаж байна. Энэ нь сүүлийн 10 жилийн хугацаанд хоёр Солонгос хоорондын хувийн хэвшлийн худалдаа дахин нээгдэж магадгүй байгаа ховор мөч юм. Өмнөд Солонгосын Нэгдлийн яамны мэдээлснээр тус асуудлаар Үндэсний татварын алба, Хүнс, эмийн аюулгүй байдлын яам, Үндэсний тагнуулын албанаас бүрдсэн ажлын хэсэг энэ сарын эхээр хуралджээ. Хуралдааны эцэст одоогийн аюулгүй байдал, менежментийн стандартыг шинэчлэх шаардлагатай гэж тохиролцсон байна.

Өмнөд Солонгосын нэгэн бизнес эрхлэгч Нэгдлийн яамнаас зөвшөөрөл авч, Хойд Солонгосын согтууруулах ундааг импортлохыг оролдсоноор энэ ажлын эхлэл тавигджээ. Тухайн хүн нийт 3500 шил хоёр төрлийн согтууруулах ундаа импортлохоор зорьжээ. Эдгээр нь 16-60 хувийн спиртийн агууламжтай, нэрс жимснээс гаргаж авсан Тулжуксул архи болон 40 хувийн спиртийн агууламжтай, шар буурцаг, исгэсэн шошо, хүн орхоодойноос гаргаж авсан Корё Доэнжангсул архи юм.

Корё Доэнжангсул архи нь эрүүл мэндэд олон талын ашиг тустай гэдгээрээ алдартай.

Хүнс, ундаа импортлогчид тухайн бүтээгдэхүүнийг үйлдвэрлэдэг байгууламжийн талаарх дэлгэрэнгүй мэдээллийг Хүнс, эмийн аюулгүй байдлын яаманд ирүүлэх шаардлагатай байдаг. Аюулгүй байдлын ямар нэг асуудал гарвал яамны зүгээс газар дээр нь шалгалт хийдэг. Гэвч дээр дурдсан бизнес эрхлэгч Нэгдлийн яамнаас зөвшөөрөл авч чадсан ч Хойд Солонгосын эрх баригчдаас холбогдох баримт бичгээ гаргуулж авч чадаагүй. Иймээс 3500 шил архи нь гурван сарын турш гааль дээр хадгалагдаж байгаа аж.

Угтаа бол Нэгдлийн яам 15 жилийн хугацаанд анх удаа хувийн хэвшилд Хойд Солонгостой бизнес эрхлэх зөвшөөрөл олгожээ. Хойд Солонгос улс Өмнөдийн байлдааны хөлгийг живүүлж, 47 далайчин амиа алдсанаар 2010 онд хоёр улс бүх төрлийн худалдааны харилцаагаа тасалсан. Өмнөдийн ерөнхийлөгч асан Мүн Жэ Иний үед Хойд Солонгостой худалдаагаа сэргээхийг оролдсон боловч бүтээгүй.

Тэгвэл энэ удаад импортлохоор оролдож буй архи нь НҮБ-ын Аюулгүйн зөвлөлийн хоригт хамаарахгүй гэж Нэгдлийн яам мэдэгдэж байна. Согтууруулах ундаа нь хориг арга хэмжээ авсан барааны жагсаалтад ороогүйгээс гадна төлбөрийг бэлэн мөнгөөр бус элсэн чихрээр хийсэн аж.

Гэсэн ч одоо байгаа дүрэм журам нь учир дутагдалтай гэж үзсэн тул шинэчлэхээр болжээ. Дүрэм журам эцэслэн батлагдах хүртэл гааль дээр гацсан байгаа согтууруулах ундаануудыг оруулахгүй. Үйл явц жигд үргэлжилж чадвал шинэ удирдамж нэг сарын дотор бэлэн болно.