Өмнөх Ерөнхий сайд Л.Оюун –Эрдэнэд “Сэлэмний чинь ир, хутганы чинь хуй болъё” хэмээн ам тангараг өргөж байсан Б.Энхбаяр одоо экс Ерөнхий сайдын эсрэг улстөржилтөд  Г.Занданшатарын сэлэмний ир, хутганы хуй болчихсон  тууж явна.  Мань эрийн улааныг харж урваж, шарыг харж шарвадгийн тод жишээ л дээ, энэ. Хууль зүйн сайдын сэлэмний ирийг эзэн нь хангалттай ирлэж өгсөн бололтой. Байсхийгээд л сүр сүр мэдэгдэл хийдэг болов. Түүний улстөрд орж ирсэн цагийг ухраагаад харахаар “Цаг нь болохоор хэлнэ, баримтыг нь дэлгэнэ” гэдэг алдарт ганц  үгтэй. Сүртэй дүр эсгэж дэлгэсэн “но” бүхэн нь батлагддаггүй гэмтэй.

Хамгийн тод жишээ гэхэд нүүрсний машинтай 40 сэтгүүлчийн тухай дуулиан нь байна. Харамсалтай нь тэр өнөөдрийг хүртэл нүүрсний машинтай нэг ч сэтгүүлчийн нэрийг хэлсэнгүй. Саяхан “Хэвлэл мэдээллээр намайг харлуулах тэрбум төгрөгийн акц явсан” гэсэн үг унагаатахна лээ. Нүдээ бүлтийлгэж байгаад “Танай эрхлэгчийг би хэлэх үү” гэх мэтчилэнгээр далим гарах бүрт сэтгүүлчид рүү дайрч,  гүтгэж, доромжилдог нь түүний гэм биш зан. Бүр харцаараа, үг, биеийн хэлэмжээрээ хэвлэл мэдээллийнхэнд  дайсагнана.Тэгсэн  хэрнээ амгаалалт бамбай хэрэгтэй болохоороо хамгийн түрүүнд сэтгүүлч рүү гүйж очиж ярилцлага өгч попрох нь хоржоонтой.

“Б.Энхбаяр надад өширхөөд байгаагийн нэг шалтгаан нь миний хэлсэн нэг үгнээс болсон юм. Н.Өнөрцэцэгийг барьж хорих гээд байхад нь би, бид ийм замаар явж болохгүй ээ боль  гэж хатуу хэлсэн. Тухайн үед Их тэнгэрт болсон уулзалтад Б.Энхбаяр бид хоёроос гадна Л.Оюун-Эрдэнэ, Я.Содбаатар, Г.Занданшатар нар байсан. Харамсалтай нь Н.Өнөрцэцэг шоронд суусан” гэж баримт тавим жишээтэй ярьсан нь ердөө саяхны явдал.

Б.Энхбаярын сэтгүүлчдийн эсрэг өдүүлсэн дайн дуусахгүй нь бололтой. Өнгөрсөн долоо хоногт Засгийн газрын эсрэг зохион байшгуулалттай харлуулах үйлдэл хийсэн сэтгүүлчийг хорьсон гэж мэдээлэхдээ  даваа гарагт  нүүрсчин сэтгүүлчдийг зарлана гэж мэдэгдэнэ лээ. Тэр өдөр нь өнөөдөр. Энэ өдөр хэчнээн сэтгүүлч Хууль зүйн сайдын хорхойтой араанд зуугдахыг өнөөхөндөө таамаглах арга алга. Дашрамд онцлоход сайдын хорьсон гэж буй хүн нь сэтгүүлч биш  компьютерийн ард эвлүүлэг хийгээд суудаг  залуу болж таарсан. Тэгэхээр Б.Энхбаяр сэтгүүлчидтэй эхлүүлсэн сүржин дайнаа жирийн нэг эвлүүлэгч залуугаар туг тахисан болоод дуусгаж ч мэднэ.

Гэхдээ түүнийг хэвлэлийнхнийг хангалттай муухай харагдуулж, хагаралдуулж, доромжилж, барьж хорьж  чадсан цор ганц улстөрч гэдгийг мартаж болохгүй. Хэн нэгнээс өш авахдаа гаргууд гэж ойрын хүрээнийхэн нь шивнэлддэг энэ эрхэм  хэрэгтэй цагт хэнийг ч юм буруутнаар зарлаж, хэрэгцээгүй бол зарлахгүй хав дарж, бүлтийтэл гүлдийхдаа хачин гарамгай. Түүний сүүлийн үйлдлүүдээс засгийг шүүмжилсэн сэтгүүлчдийг эхнээс нь барьж хорих санаархал яалт ч үгүй харагдаад байна. Хамгийн эмзэглэмээр нь “шударга” нэрийн дор, Хууль зүйн сайдын том бамбайн дор хэнийг ч хэлмэгдүүлж гүтгэх, харлуулж, шившиглэх авир үнэртээд горьгүй нь. Яг л өмнөх зууны хэлмэгдүүлэлтийн хар жилүүдийн гол дүр Мангас До шиг дүр тодроод байх боллоо. До яамныхан “Хүн нь байхад хэрэг нь олдоно” гэсэн зарчмаар ажиллаж монгол айл бүрийг хагацалд унагаж байв. Хууль зүйн сайдын олон үйлдлээс До яамны энэ зарчим ажиглагдаад байх юм.Ингээд харахаар түүнийг орчин цагийн “Ногоон малгайт” гэчихмээр.

Ийм хүн ардчилсан Монголын Хууль зүйн сайдаар ажиллаж, засгийн газрыг шүүмжилсэн сэтгүүлч бүрийг барьж хориод эхэлбэл өнгөрсөн зууны хэлмэгдлийн гашуун түүх давтагдах эрсдэлтэй. Хууль зүйн сайдын том дуугаар хийж буй  мэдэгдлүүдээс харахад хэлмэгдлийн хаалгыг торохгүй татчихав уу гэж айдас төрөхөөр байна, ялангуяа хэвлэлийнхэнд.

 Эх сурвалж: Өдрийн сонин