Африк гаралтай 1,400 гаруй хүн Оросын хийж буй түрэмгийлэлд оролцож байгаа гэж Украины гадаад хэргийн сайд Андрей Сыбиха мэдэгдэв. Тэрбээр цахим сүлжээнд мэдэгдэхдээ, "Одоогоор Африкийн 36 орноос нийтдээ 1,436 иргэн Оросын довтолгооны армийн бүрэлдэхүүнд тулалдаж байна. Бодит тоо үүнээс ч их байх магадлалтай” гэжээ. Сыбиха Орос улс африкчуудыг мөнгө амлах, гэрээнд хуурч гарын үсэг зуруулах зэрэг аргаар элсүүлж байна гэж онцолжээ. Түүний хэлснээр, олон хөлсний цэргүүд нэг сараас илүү хугацаанд амьд үлддэггүй аж.

Сыбиха Африкийн бүх засгийн газрыг иргэдээ Оросын довтолгооны армид элсэхгүй байхыг анхааруулахыг уриалжээ. Украинтай дайтаж буй Оросын талд тулалдах нь хууль бус бөгөөд олон улсын хуулийг зөрчиж байгаа явдал гэж тэрбээр тайлбарлаж байна. Түүнчлэн фронт руу тулалдуулахаар илгээгдсэн африкчуудыг боломж гарвал зугтаж эсвэл Украинд олзлогдохыг Сыбиха уриалж байна. Учир нь Украин улс олон улсын хүмүүнлэгийн хуулийн бүх стандартын дагуу барьцаалагдсан, олзлогдсон хүмүүстэй харьцдаг гэжээ.

Кенийн ерөнхийлөгч Уильям Руто өөрийн цахим сүлжээнд нийтлэхдээ, Украины ерөнхийлөгч Владимир Зеленскийтэй утсаар ярилцаж, “Украинд хоригдож буй Кенийн иргэдийг суллахад туслалцаа үзүүлэхийг хүссэн” гэжээ. Ройтерс болон бусад хэвлэл мэдээллийн хэрэгслүүдийн мэдээлснээр, Өмнөд Африкийн засгийн газар Оросын талд тулалдаж буй 17 иргэнээс тусламж хүссэн дуудлага хүлээн авсан байна.