Японд баавгайн дайралт ихсэж, орон нутгийн оршин суугчдын айдас нэмэгдэж байна. Энэ санхүүгийн жилд л гэхэд 13 хүн баавгайн дайралтад амь насаа алджээ. Тухайлбал, Ямагата мужийн нэгэн уламжлалт хэв маягийн амралтын газрын байшинд Баасан гаригт (2025.11.07) гэнэт баавгай орж, бүх зүйлийг сүйтгэсэн. Азаар байшингийн эзэд зугтаж чадсан байна. Тус үйл явдлын гэрч Сасаки Казуо баавгайн дайралтаас болж амралтын газраа хаах шийдвэрт хүрсэн аж. Тэрбээр хэлэхдээ, "Баавгайнууд өмнө нь амралтын газрын ойролцоо ирж байсан ч хэзээ ч байшинд орж ирж байгаагүй" гэсэн байна. Орон нутгийн анчид яаралтайгаар баавгайг агнасан ч оршин суугчдын айдас хэвээр байгаа юм.

Иватэ мужийн оршин суугчид бага насны хүүхдүүддээ хараа хяналтаа сайжруулж, сургууль, цэцэрлэгт нь хүргэх, авахдаа болгоомжтой байх арга хэмжээг авч эхэлжээ. Такси болон сургуулийн автобусны жолооч Сүгимото Шүтаро хэлэхдээ, "Автобус нарийн замаар явах боломжгүй байдаг. Тиймээс хүүхдүүдийг аль болох гэрийнх нь гадаа буулгаж өгөх хэцүү" гэж хэлсэн байна.

Үүний зэрэгцээ баавгайнууд уулнаас бууж ирэх тохиолдол нэмэгдэж байгаа нь байгалийн тэнцвэрт байдал алдагдсаныг илэрхийлж байгаа бололтой. Мэргэжилтнүүдийн хэлснээр, ойн бүс нутагт амьтдад шаардлагатай хоол, тэжээл хомс болсноос болж өлссөн амьтад идэх зүйл хайж байна. Токиогийн Хөдөө аж ахуй, технологийн их сургуулийн профессор Койке Шинсуке "Намрын улиралд гол хүнсний эх үүсвэр болдог царсны боргоцой болон бусад самар хомсодсон байж болзошгүй тул баавгайнууд илүү өргөн уудам нутагт тэнүүчилж байж магадгүй" гэжээ. Японы Ойн агентлагийн албан тушаалтнууд ч мөн адил байр суурьтай байна. Тэд энэ жил Японы зүүн хойд хэсэгт шаргал самрын ургац маш муу байсан гэж мэдэгдэв.