УИХ-ын гишүүн О.Саранчулуун УИХ-ын гишүүн Ж.Батсуурийн талаар УИХ-ын Ёс зүйн дэд хороонд гомдол гаргаж байгаа талаараа мэдэгдээд байна. Тэрбээр, өөрийн цахим хуудастаа "УИХ-ын гишүүн, сайд асан Ж.Батсуурь арваннэгдүгээр сарын 06-ны өдрийн чуулганы нэгдсэн хуралдааны үеэр гаргасан үйлдэл нь хэд хэдэн хууль, зохицуулагдах хэм хэмжээг зөрчсөн тул албан ёсоор Ёс зүйн хороонд хандлаа. Энд би жендер ярьсангүй, нам ярьсангүй. Хүний суурь эрх нь хангагдахгүй байгаа хөгжлийн бэрхшээлтэй иргэддээ тэгш хандах, халамж асаргааны 300 мянган төгрөг хаанаа ч хүрэхгүй байна, нэмэгдүүлэх боломж байгаа эсэхийг чуулганы танхимд асуусны төлөө гутаан доромжлууллаа. Мөн гадаа хөгжлийн бэрхшээлтэй иргэд жагсаж байхад энэ үйлдэлдээ харамссан шинжгүй, хоёр намын асуудал болгож гуйвуулан, дуу захиалж өгч байгаа нь улам даапаалсан, үл хайхарсан шинжтэй байна. Та хэлсэн үгэндээ эзэн байж, хариуцлагаа хүлээнэ үү" хэмээн оруулжээ.

УИХ-ын гишүүн О.Саранчулуун болсон хэрэг явдлын талаар гаргасан гомдолдоо тодотгохдоо, 2025 оны арваннэгдүгээр сарын 06-ны өдөр УИХ-ын чуулганаар Монгол Улсын 2026 оны төсвийн хүрээний мэдэгдэл, 2026-2027 оны төсвийн төсөөллийн тухай хуульд өөрчлөлт оруулах тухай хуулийн төслийн хэлэлцүүлгийн үеэр гишүүд асуулт асууж, үг хэлэх дарааллын дагуу миний бие оногдсон хугацаандаа асуулт асууж байх явцад дэг, ёс зүйн хэм хэмжээ зөрчин тасалдуулж, гутаан доромжилсон үг, үйлдэл гаргалаа. Тодруулбал, хөгжлийн бэрхшээлтэй иргэдийн тэтгэмжийг нэмэгдүүлэхтэй холбогдуулан асуулт асуух явцад УИХ-ын гишүүн Ж.Батсуурь хэд хэдэн удаа тасалдуулан, чуулганы танхимд "Дараагийн асуудал руугаа оръё" гэж чангаар хашхирч "Дандаа идэж ууж, халамж авах тухай ярьж байдаг" гэж намайг болон хөндөж буй асуудлаарх хөгжлийн бэрхшээлтэй хүмүүсийг гутаан доромжилсон, үl хайхарсан үг, үйлдэл гаргалаа. Иймд холбогдох хууль тогтоомжид заасны дагуу УИХ-ын  Ж.Батсуурийн дээрх үг, үйлдлийг шалган ёс зүйн зөрчил гаргасан болохыг тогтоож, олон нийтийн өмнө уучлалт гуйхыг үүрэг болгох, сахилгын хариуцлага ногдуулж өгнө үү гэж ээ.