Европын холбоо Оросын иргэдэд олон удаагийн виз олгохоо больж байна. Ингэснээр оросууд Европын холбооны орнуудад аялах тоолондоо шинээр виз авах шаардлагатай болно гэсэн үг. Аюулгүй байдлын эрсдлийг бууруулахын тулд өргөдөл гаргагчдыг нягт нямбай шалгах зорилгоор ийм шийдвэр гаргасан гэж албаныхан мэдэгджээ.

Гэвч энэ алхам нь Путинтэй холбоо хамааралгүй энгийн иргэдийг хохироож байна гэж үзэгсэд ч бий. Тэр дундаа улс төрийн дарангуйлал, цэрэг татлагаас зугтаж Европыг зорьж буй иргэдэд визний шаардлага нь дарамт болох магадлалтай.

Украин дахь дайн эхэлсний дараахан Европын холбоо Оростой байгуулсан визний хөнгөвчлөх гэрээгээ түдгэлзүүлсэн. Энэ нь оросуудын аяллын баримт бичиг авах үйл явцыг илүү төвөгтэй болгосон юм.

Олон удаагийн визний хязгаарлалтад бие даасан сэтгүүлчид, эсэргүүцэгчид, хүний эрхийн хамгаалагчид хамаарахгүй. Мөн Европын холбооны иргэншилтэй оросуудад хамаарахгүй.

Европын комиссын мэдээлснээр 2025 онд 552 мянга орчим Шенгений виз оросуудад олгожээ. Энэ нь өнгөрсөн жилийнхээс бараг 100 мянгаар их боловч 2019 онд олгосон дөрвөн саяас хамаагүй бага тоо юм. Ихэнх визийг Итали, Франц, Испани улсууд олгожээ. Харин Балтын орнууд оросуудыг бараг нэвтрүүлээгүй.