ОХУ-ын Гадаад хэргийн сайд Сергей Лавров ерөнхийлөгч Путины тааллыг алдсан, учир нь түүний дипломат ажиллагаа Украины энхийн асуудлаарх Вашингтон, Москва хоорондын хэлэлцээг цуцлахад хүргэсэн гэх таамаг саяхнаас гарч ирсэн. Тодруулбал, өнгөрсөн сард Путин, Трамп нар Будапештэд уулзах төлөвтэй байсан ч эцсийн мөчид уулзалт цуцлагдсан билээ. Учир нь Лавров, АНУ-ын Төрийн нарийн бичгийн дарга Марко Рубио нар хурц ширүүн яриа өрнүүлсний дараа Путин, Трамп нарын уулзалт цуцлагдсан бөгөөд Вашингтоны албан тушаалтнууд Лавровын уян хатан бус байдалд цочирдсон байж магад аж. Үүний дараа Путин Гадаад хэргийн сайдынхаа гүйцэтгэлд сэтгэл дундуур байгаа гэх таамаг гарчээ.

Лавровыг Рубиотой ярилцсаны дараа Путин түүнтэй илүү ноцтой яриа хийсэн байж магадгүй аж.

Тэгвэл цуу ярианы хариу болгож Кремлийн хэвлэлийн төлөөлөгч Дмитрий Песков мэдээлэл хийхдээ "Эдгээр мэдээлэлд үнэн зүйл алга. Лавров гарцаагүй Гадаад хэргийн сайдаараа ажилласаар байгаа" гэжээ.

Гэхдээ Путин, Трамп нарын уулзалт цуцлагдсаны дараа Лавров Аюулгүйн зөвлөлийн хуралдаанд ганцаараа оролцоогүй. Зөвлөлийн байнгын гишүүн Лавровын ирц дутуу тус хуралдааны үеэр Путин цөмийн туршилтыг сэргээх санал боловсруулахыг албан тушаалтнуудад даалгасан байна. Лавров Аюулгүйн зөвлөлийн хуралдаанд ирээгүй нь цаанаасаа зохицуулалттай зүйл байсан гэдгийг нэрээ нууцалсан эх сурвалж хэлжээ.

Түүнчлэн удахгүй болох "Их-20"-ийн дээд хэмжээний уулзалтад Оросын төлөөлөгчдийг Лавров толгойлон оролцохгүй болжээ. Энэ үүргийг Ерөнхийлөгчийн тамгын газрын орлогч дарга Максим Орешкин гүйцэтгэнэ.

Мөн өнгөрсөн сард болсон АСЕАН-ы дээд хэмжээний уулзалтад Оросын төлөөлөгчдийн тэргүүлэн шадар сайд Алексей Оверчук оролцжээ. Өмнөх жилүүдэд Лавров байнга тэргүүлж оролцож байв.

Янз бүрийн таамаглалууд харагдаж байгаа ч Лавровыг Кремль дотор илүү олон өрсөлдөгчтэй болсон байх магадлалтай гэж үзэж байна.

ОХУ-ын дипломатч асан Борис Бондарев Лавровын Кремльд эзлэх байр суурь буурсан эсэх дээр үзэл бодлоо илэрхийлжээ. Тэрбээр "Хэвлэл мэдээллийн хэрэгслүүд ийм хэтрүүлсэн хувилбар дэвшүүлэх дуртай. Гэхдээ Лавров америкчуудыг түгшээх зүйл хэлээгүй. Тэр 21 жил Гадаад хэргийн сайдаар ажиллаж, Путинтэй тууштай хамтарсан хүн. Рубиод бүдүүлэг хандаж, хэлэлцээр хийх хүсэлгүй байгаагаа харуулсан, дээд хэмжээний уулзалтыг цуцлахад хүргэсэн зэрэг цуурхал бол утгагүй зүйл. Гэхдээ нөгөө талаасаа Путин бүтэлгүй хэлэлцээний хариуцлагыг хүлээхээс зайлсхийхийн тулд бурууг Лавровт тохох магадлалтай" гэжээ.