Хойд Солонгос өнөөдөр /2025.11.07/ Зүүн тэнгис рүү нэр нь тодорхойгүй баллистик пуужин харвасныг Өмнөдийн арми мэдээллээ. Өмнөдийн Штабын дарга нарын нэгдсэн хороо хөөргөлтийг илрүүлсэн гэдгээ мэдэгдсэн ч илүү дэлгэрэнгүй мэдээлэл өгсөнгүй. Пуужингийн төрөл, тусгалын цар хүрээг өдгөө үнэлж байгаа аж.

Хойд Солонгос улс хамгийн сүүлд АПЕК-ийн дээд хэмжээний уулзалт болон Трампын уулзалтаас урьтан аравдугаар сарын 22-нд богино тусгалтай баллистик пуужин харвасан. Энэ нь Хойд Солонгосын энэ жил харвасан долоо дахь баллистик пуужин байв. Мөн Өмнөд Солонгосын ерөнхийлөгч Ли Жэ Мёныг албан тушаалаа авснаас нь хойших хоёр дахь пуужин юм.

Дашрамд дурдахад, АНУ Умардын хоёр байгууллага болон найман хувь хүнд хориг арга хэмжээ авч буйгаа энэ долоо хоногт зарласан. Энэхүү мэдэгдлийн дараа Умардын тал ийнхүү пуужин харваж байна. АНУ-ын хориг арга хэмжээг Хойд Солонгосын эрх баригчид дайсагнасан бодлого гэж мэдэгдээд, зохих хариу арга хэмжээг авна гэжээ.