Монгол Улсын хэмжээнд зөрчил шалган шийдвэрлэх эрх бүхий албан тушаалтны 2025 оны аравдугаар сарын 27-ноос арваннэгдүгээр сарын 3-ны өдрийг хүртэл хугацаанд хүлээн авсан 56143 зөрчлийн талаарх гомдол, мэдээллийг нэгдсэн санд бүртгэсэн талаар прокурорын байгууллагаас мэдээллээ. Тодруулбал, эрх бүхий албан тушаалтан 53250 гомдол, мэдээлэл буюу 94.8 хувийг газар дээр нь, 1031 буюу 1.8 хувийг бүртгэлд авч хялбаршуулсан журмаар торгох шийтгэл оногдуулжээ. Үүнээс гадна 1479 буюу 2.6 хувьд нь зөрчлийн хэрэг бүртгэлтийн хэрэг нээсэн байна. Бүртгэгдсэн нийт зөрчлөөс замын хөдөлгөөний аюулгүй байдлын тухай хууль зөрчих зөрчил 46628 буюу 83.1 хувь, олон нийтийн газарт зүй бусаар биеэ авч явах зөрчил 5114 буюу 9.1 хувь, жолоочийн даатгалын тухай хууль зөрчих зөрчил 1256 буюу 2.2 хувь, автотээврийн тухай хууль зөрчих зөрчил 809 буюу 1.4 хувь, гэр бүлийн хүчирхийлэлтэй тэмцэх тухай хууль зөрчих зөрчил 325 буюу 0.6 хувь, танхайрах зөрчил 248 буюу 0.4 хувийг эзэлж байгаа нь хамгийн их байна.

Мөн прокурор эрх бүхий албан тушаалтны зөрчлийн талаарх гомдол, мэдээллийг хүлээн авахаас татгалзаж шийдвэрлэсэн 622 шийдвэрийг хянаж, 80 буюу 12.8 хувийг хүчингүй болгож, зөрчлийн хэрэг нээж, 2 буюу 0.3 хувийг нэмэлт ажиллагаа хийлгэхээр буцааж, 6 буюу 0.9 хувийг хүчингүй болгож, эрүүгийн хэрэг бүртгэлтийн хэрэг нээж, мөрдөн шалгах байгууллагад шилжүүлсэн байна.

Мөн эрх бүхий албан тушаалтны зөрчлийн хэргийг хэрэгсэхгүй болгосон 43 шийдвэрийг хянаж, 6 буюу 13.9 хувийг хүчингүй болгож, зөрчлийн хэрэг бүртгэлтэд буцааж, 11 буюу 25.6 хувийг хүчингүй болгож, эрүүгийн хэрэг бүртгэлтийн хэрэг нээж, 1 буюу 2.3 хувьд нь эрүүгийн хэрэг үүсгэж, яллагдагчаар татаж, хэргийг мөрдөн шалгах байгууллагад шилжүүлж шийдвэрлэн тус тус хохирогчийн зөрчигдсөн эрхийг сэргээжээ.

Зөрчлийн улмаас нийт 924 сая төгрөгийн хохирол учирснаас 389 сая төгрөг буюу 42.1 хувийг, үүнээс төр, нийтийн ашиг сонирхолд учирсан 136 сая төгрөгийн хохирлыг зөрчил шалган шийдвэрлэх ажиллагааны явцад нөхөн төлүүлжээ.