Донецкийн баруун хэсэгт орших стратегийн ач холбогдолтой Покровск хотыг хамгаалалтын тэргүүлэх чиглэл гэж Украины ерөнхийлөгч Зеленский саяхан мэдэгдсэн билээ. Мөн тэрбээр Покровскийн ойролцоох командлалын цэгүүдээр очиж, цэргүүдтэй уулзсан байна.

ОХУ стратегийн фронт, ложистикийн төв болох Покровскийг эзлэхийг нэг жил гаруй оролдож байна. Хэрвээ Покровск Оросын гарт орвол Украин ойрын хэдэн сард амсаагүй хамгийн том хохиролтойгоо нүүр тулах юм. Өөрөөр хэлбэл, Путин чадвал Украины аж үйлдвэржсэн зүүн хэсгийг бүхэлд нь хянах зорилгодоо нэг алхам ойртоно гэсэн үг.

Покровск эзлэгдэхэд хэр ойрхон байгаа вэ?

Үнэн худал мэдээллүүд цахим сүлжээнд хөвөрч буй тул тодорхой хугацаа хэлэхэд хэцүү. Гэхдээ ОХУ бүс нутагт олон мянган цэрэг цуглуулж, хот руу нэвтэрч, барилга байгууламж, гудамжууд болон Украины цэргийн байрлалыг аажмаар эзэлж буй нь үнэн бололтой.

Покровск бүслэгдсэн гэсэн мэдэгдлийг Украины хүчин Лхагва гаригт үгүйсгэсэн бөгөөд Оросын армийг идэвхтэй эсэргүүцэж, хааж байгаа гэж мэдэгдсэн. Гэсэн ч нээлттэй эх сурвалжуудын нийтэлсэн тагнуулын газрын зургаас харахад Оросын арми Покровскийн томоохон хэсгийг эзэлсэн байх өндөр магадлалтай байна. Мөн Покровск дахь украин цэргүүд тоогоороо хамаагүй цөөн байгааг эх сурвалж мэдээлэв.

Покровск Орост яагаад тийм чухал вэ?

ОХУ-ын арми 2024 оны хоёрдугаар сард зүүн зүгийн Авдеевка хотыг эзэлснээс хойш овоо хараагаа Покровск руу чиглүүлсэн. Хэрэв Покровск эзлэгдвэл Украин дагуул хот болох Мирноградыг хамгаалах бараг боломжгүй болох юм. Ингэснээр ОХУ зүүн хойд хэсэгт орших Костянтиновка болон Дружковка, Краматорск, Славянскийн төлөөх тулаанд анхаарлаа төвлөрүүлж чадна. Эдгээр хотыг цайз бүс гэж нэрлэдэг.

Гэхдээ Украинд ухарч, хамгаалалтаа дахин тохируулах боломж байгаа гэдгийг Олон улсын энх тайвны төлөөх Карнегийн сангийн шинжээч Майкл Кофман хэлэв. Өдгөө ОХУ урагшилж байгаа ч гэлээ энэ нь төдийлөн эрчтэй бус мөлхөө довтолгоо гэдгийг тэр онцолж байна.

Покровск Украинд яагаад тийм чухал вэ?

Покровскийн ихэнх хэсэг эзгүйрсэн ч гэлээ Украины армийн хувьд стратегийн чухал үүрэг гүйцэтгэсэн хот. Тус хот дайны өмнө 60 мянга орчим хүн амтай байсан бөгөөд Украины гангийн үйлдвэрт чухал ач холбогдолтой коксжих нүүрс үйлдвэрлэдэг цорын ганц уурхайтай ойр байрладаг. Гэвч энэ он гарсаар хотыг нүүлгэн шилжүүлж, эзгүйрсэн тул нүүрсний үйлдвэр зогсонги байдалд орсон.

Юу юунаас илүүтэй Покровск бол зүүн хэсэгт байрлах төв зам, төмөр замын уулзвар хот юм. Тиймээс хотыг алдах нь Оросын армид Днепропетровск муж руу давших замыг нээж өгнө. ОХУ өдгөө Павлоград, Днепропетровск руу чиглэсэн төв замд хэдийнэ ойртож ирээд байгаа билээ. Баруун өмнө зүгт ОХУ Днепропетровсктой хиллэдэг Донецкийн ойролцоо давшиж байна. Мөн өөр нэг том зам нь Запорожье руу хөтөлдөг.

Покровскийн уналт дайныг өөрчлөх үү?

Путин Донецкийг бүхэлд нь Орост нэгтгэсэн тохиолдолд дайныг зогсооно гэсэн нөхцөл болзол тавиад буй. Гэхдээ ОХУ Донбассыг бүхэлд нь бүрэн эзлэхэд нэлээн хэдэн жил байлдах шаардлагатай гэдгийг Украин баталсан билээ. Ганц Украин ч биш, АНУ-д төвтэй Дайны судалгааны хүрээлэн хүртэл “ОХУ цайз бүсийг тийм хурдан бүслэх, эсвэл нэвтрэх боломжгүй. Үүнд хэдэн жил шаардагдана” гэж мэдэгдсэн юм.

Цахилгаан эрчим хүчний хомсдолд ороод буй өвлийн эхэн үед Покровскийг алдах нь Украинд мэдээж томоохон цохилт болно. Хотыг хамгаалахад зориулагдсан хүн хүч, нөөц, тоног төхөөрөмжийн зардлыг ярих юм биш.

Нөгөөтэйгүүр, Покровскийг алдах нь Оросын хэлэлцээрийн байр суурийг улам бэхжүүлэх болов уу.

АНУ-ын ерөнхийлөгч Дональд Трамп өнгөрсөн есдүгээр сард Оросыг цаасан бар гэж нэрлэсэн билээ. “ОХУ дайн эхлүүлэхдээ ганц долоо хоногийн дотор ялна гэж байсан ч яаж ингэж гурав, дөрвөн жил болж чадав? Энэ нь тэднийг цаасан бар гэдгийг харуулж байна” гэж Трамп хэлсэн. Тэгэхээр ОХУ Покровскийг эзэлж чадвал Трампад өөрсдийгөө цаасан бар биш гэдгийг нотолж буйтай агаар нэг аж.