Оросын ерөнхийлөгч Владимир Путин ахлах албан тушаалтнууддаа цөмийн зэвсгийн туршилт явуулахад бэлтгэж эхлэх шаардлагатай эсэхийг судлах үүрэг өгчээ. Путин Лхагва гаригт (2025.11.05) АНУ-ын ерөнхийлөгч Дональд Трампын Батлан хамгаалах яамандаа өгсөн чиглэлтэй холбоотой асуудлаар Аюулгүй байдлын зөвлөлийн хурал хийсэн байна. Тодруулбал, өнгөрсөн сарын сүүлээр Трамп Пентагонд цөмийн туршилт хийхийг үүрэг болгожээ.

Оросын батлан хамгаалах сайд Андрей Белоусов Аюулгүй байдлын зөвлөлийн хурал дээр яаралтайгаар бүрэн хэмжээний цөмийн туршилт хийх бэлтгэл ажлыг эхлүүлэх хэрэгтэй гэж үзэж буйгаа мэдэгдсэн байна. Зэвсэгт хүчний ерөнхий штабын дарга Валерий Герасимовын хэлснээр, туршилтын төрөл, хэмжээнээс шалтгаалан цөмийн туршилт хийхэд шаардлагатай бэлтгэл ажил хэдэн сараас хэдэн жил үргэлжилж болох аж. Хэрэв одоо зохих арга хэмжээ авахгүй бол АНУ-ын үйлдэлд хариу өгөх боломжийг Орос улс алдах болно гэж тэрбээр онцлон тэмдэглэсэн байна.

Хариуд нь Путин, Орос улс цөмийн туршилтыг бүрэн хориглох тухай гэрээнд заасан үүргээ үргэлжлүүлэн биелүүлэх болно гэдгээ онцолсон байна. Тэрбээр 2023 онд хийсэн нэгэн илтгэлдээ, хэрэв АНУ болон бусад улс орнууд цөмийн туршилт хийвэл Орос улс зохих эсрэг арга хэмжээ авах шаардлагатай болно гэж хэлж байсан. Үүний дараа Путин, албан тушаалтнуудад цөмийн зэвсгийн туршилт хийхэд бэлтгэх ажлыг эхлүүлэх боломж, хэрэгцээний талаар санал боловсруулж танилцуулах үүрэг өгсөн байна.