УИХ-ын гишүүн Д.Амарбаясгаланд прокуророос хэрэг үүсгэсэн талаар цөөн хэдэн нэр бүхий хэвлэлээр мэдээлэгдсэн. Улс төрийн зорилготойгоор хэрэг үүсгэсэн байх магадлалтай уг асуудалд УИХ-ын гишүүн Д.Амарбаясгалан гомдол саналаа гаргаж, гэм буруугүйгээ нотлох баримтуудаа гаргаж, хэргийг хянан шийдвэрлэх ажиллагаанд саад учруулахгүй оролцож байна. Тэрбээр МАН-ын даргын сонгуульд өрсөлдсөн нь улс төрийн гэмт хэрэгт татах хэмжээнд хүртэл асуудал өрнөчихөөд байгаа билээ. Өөрөөр хэлбэл, есдүгээр сарын 27-нд болсон МАН-ын даргын сонгуульд Д.Амарбаясгалан олонхын санал авч, МАН-ын дарга болсон байдаг.

Гэвч түүний өрсөлдөгч Г.Занданшатар ялагдлаа хүлээн зөвшөөрөхгүйгээ илэрхийлснээр Монголын улс төр өмнө нь байгаагүйгээр бужигнаж эхэлсэн юм. Тухайлбал, Д.Амарбаясгалан МАН-ын даргын тамгыг хүлээн авснаас ердөө гурав хоногийн дараа буюу есдүгээр сарын 30-нд Ерөнхий сайд Г.Занданшатар өрөөндөө мэдэгдэл хийж, “УИХ-ын дарга Д.Амарбаясгалан нүүрсний хулгайтай нэр холбогдсон” гэж зарлаад, УИХ-ын гишүүн Б.Энхбаярыг ХЗДХ-ийн сайдаар томилохоо мэдэгдсэн байдаг. Б.Энхбаярын хувьд Д.Амарбаясгаланг МАН-ын даргад өрсөлдөхөө зарласан цагаас эхлэн нүүрсний хулгайгаас авахуулаад хүн амины ноцтой гэмт хэрэгт хүртэл гүтгэж эхэлсний учир ингэж тайлагдсан билээ. Ийнхүү яаравчлан АТГ-аас түүнд хэрэг үүсгэсэн нь ирэх долоо хоногт болох эрх баригч намын 31 дүгээр Их хурлаас өмнө хуралд оролцуулахгүй байх тактик байх ч магадлалтай юм.