Цаг уур, орчны шинжилгээний газар (ЦУОШГ) болон Онцгой байдлыг ерөнхий газар (ОБЕГ) хамтран өнөөдөр (2025.11.05) мэдээлэл хийлээ.

Нутгийн баруун өмнөд хэсгээр өнөөдөр оройдоо цаг агаар тогтворгүй болно. Нутгийн зүүн хагаст 5-12 градус дулаахан байна. Энэ үзэгдэл нь арваннэгдүгээр сарын 6-ний өдөр Баянхонгор аймгаас аюулт үзэгдлийн хэжээгээр эхэлнэ.  Архангайн зүүн, Дундговь, Баянхонгорын хойд, Өвөрхангай, Булган, Орхон, Сэлэнгэ, Дархан-Уул, Төв, Хэнтийн аймгийн ихэнх сумаар энэ сарын 7-8ны хооронд 10-20 мм нойтон цас орно. Энэ нь гамшигт үзэгдлийн хэмжээнд хүрч байна.

Говьсүмбэр, Өмнөговь, Дорноговь, Донод, Сүхбаатар аймгийн хойд сумын нутгаар 5-9 мм нойтон цас орж их цасны аюултай үзэгдэл болно. Төв, Хэнтий, Дорнод аймгийн ихэнх сумдын нутгаар цасан шуурганы аюулт үзэгдэл ажиглагдаж цасны зузаан 15-20 см орно. Гуу жалганд илүү зузаан цас тогтож малын бэлчээрлэлтэд хүндрэл учирч болзошгүй. Мөн үзэгдэх орчин хязгаарлагдаж зам, даваа, гүвээнд халтиргаа гулгаа үүсэх нөхцөл бүрдэж байгааг онцгойлон анхааруулж байна. Энэ үзэгдлийн үеэр  Цаг уурын байгууллагаас гаргаж байгаа цаг агаарын мэдээг тогтмол ашиглахыг зөвлөе.

ОБЕГ: Мэргэжлийн байгууллагаас гаргаж буй цаг агаарын мэдээг тогтмол сонсох хэрэгтэй. Малчид болон мал бүхий иргэд ойрхон бэлчээх. Бага насны хүүхдийг малд явуулахгүй байх. Гэр орноо дулаалах, хоол хүнсээ бэлтгэсэн байх хэрэгтэй. Уруудсан малын араас явахгүй байх гэдгийг онцлон анхааруулъя. Их хэмжээний цас орж авто замд халтиргаа гулгаа үүснэ. Зам даваа гүвээнүүд хаагдах учраас цаг агаарын мэдээгээ тогтмол сонсож хол, ойр явахаа шийдээрэй. Зайлшгүй авто замаар зорчих шаардлагатай бол тээврийн хэрэгслийн бүрэн бүтэн байдлыг бэлтгэх, шалгах хэрэгтэй. Айл саахалт айлуудад цаг агаарын мэдээ мэдээллийг дамжуулах гэх мэт сэрэмжлүүлгийг сахин мөрдөөрэй.