Хойд Солонгос улс өнгөрсөн есдүгээр сараас хойш 5000 орчим барилгын цэргээ Орост илгээжээ. Өмнөдийн тагнуулын агентлагийн мэдээлснээр барилгын цэргүүд Оросын дэд бүтцийн сэргээн босголтод хүчин зүтгэж байна. Үүний зэрэгцээ Орос, Украины хилийн ойролцоо 10 мянга орчим хойд солонгос цэрэг байршуулаад буйг мэдээллээ. Харин Украинд нас барсан хойд солонгос цэргүүдийн тоо 600 хүрээд байна.

Хойд Солонгос улс цэрэг байршуулсныхаа хариуд Оросоос санхүү, цэргийн технологи, хүнс, эрчим хүчний тусламж авч байгаа аж. Энэ нь Хойд Солонгосын хувьд олон улсын хориг арга хэмжээг тойрч гарах томоохон боломж юм.

Олон талт хориг арга хэмжээний хяналтын багийн өнгөрсөн сард мэдээлснээр, Хойд Солонгос улс Орос руу 40 мянган ажилчин илгээхээр төлөвлөж байна. Тэдний дунд мэдээлэл технологийн ажилтнууд ч багтаж байгаа аж. Гэхдээ НҮБ-ын хориг арга хэмжээний дагуу хойд солонгосчуудыг хилийн чанадад мөнгө олохыг хориглосон байдаг.

Дашрамд дурдахад, Ким Жон Ун, Дональд Трамп нарын 2019 оны уулзалт бүтэлгүйтсэнээс хойш Хойд Солонгос улс өөрийгөө эргэлт буцалтгүйгээр цөмийн гүрэн гэж зарласан билээ.

Трамп өнгөрсөн долоо хоногт Азийн орнуудаар айлчлахдаа Кимтэй уулзах санал гаргасан боловч Хойд Солонгос улс хариу өгөөгүй. Оронд нь Гадаад хэргийн сайдаа Москвад илгээсэн юм. Тус улсын Гадаад хэргийн сайд Чой Сон Хуй ОХУ-ын ерөнхийлөгчтэй уулзаж, хоёр улсын хамтын ажиллагааг өргөжүүлэх талаар санал нэгджээ.

Гэхдээ Ким Жон Ун АНУ-тай яриа хэлэлцээ хийх тохиромжтой цагийг хүлээж байгаа гэж үзэж байна. Трампын санал ажил хэрэг болоогүй ч гэлээ Хойд Солонгос улс боломжит уулзалтад бэлтгэлтэй байсан гэдгийг олон шинж тэмдэг харуулж байгаа аж.