Явган хүний зам, автобусны буудал дээр автозамын нэгдүгээр эгнээг хааж зогссон, автомашинаа зогсоолд бусдын хөдөлгөөнд саад болохоор байрлуулсан зөрчлийг иргэд зургаар баталгаажуулан, 102 аппликэйшнээр Замын хөдөлгөөний удирдлагын төвд  илгээвэл урамшуулал олгох зохицуулалт энэ сарын 1-нээс үйлчилж эхэлсэн.

Тээврийн цагдаагийн албанаас мэдээлснээр замын хөдөлгөөний зөрчлийг мэдээлсэн иргэнд зөрчилд ногдуулсан торгуулийн 10–20 хувийг урамшуулал хэлбэрээр олгох бөгөөд энэ урамшууллыг НӨАТ-ын буцаан олголтын хугацаатай ижил буюу 2026 оны нэгдүгээр сарын 20-нд 2025 оны сүүлийн хоёр сарын урамшууллыг, дөрөвдүгээр сарын 20-нд эхний гурван сарын урамшууллыг нэг удаа олгохоор тогтсон юм.

Зөрчлийг мэдээлэхдээ орчны тэмдэг тэмдэглэгээг харуулсан, тухайн машины улсын дугаар тодорхой харагдах нягтаршил сайтай зургийг оруулах шаардлагатай бөгөөд зөрчлийг давхардаж мэдээлбэл систем хүлээн авахгүйгээр буцаах аж.

Тэгвэл энэ сарын 1-3-нд иргэд зөрчлийн нийт 12,824 мэдээллийг 102 аппликэйшнд илгээжээ. Эдгээр мэдээллийг ЗХУТ хянаж бүртгээд, ТЦА-ны эрх бүхий алба хаагчид илгээх юм байна.