"Бахрейн-2025" Азийн залуучуудын наадамд Монгол улсаа төлөөлөн 135 тамирчин 44 дасгалжуулагч оролцож байгаа.  Эх орноо төлөөлж оролцож буй өсвөрийн тамирчдад тэмцээний зардал санхүүжилтийг шийдэж өгөөгүй учир тамирчид зочид буудлын үүдний хэсэгт хонож байгаа тухай багийн дасгалжуулагч МУГТ Г.Отгонцэцэг өөрийн цахим хуудаснаа нийтэлсэн.

Энэ талаар Соёл, спорт, аялал жуулчлал, залуучуудын сайд Ч.Ундрам тайлбар өгөв.

-Тэрбээр, “Олимпийн хорооноос энэ асуудлаар мэдэгдэл гаргасан байна лээ. Мэдэгдэлд тухайн тамирчдын очсон нислэг нь үүрээр буусан. Дэлхийн жишгээр буудалд орох цаг нь 14:00 цаг байдаг. Гэхдээ Жүдо бөхийн холбооноос,  "зочид буудалтайгаа ярилцаад 6:00 цагаас өрөөнд оруулах гээд тохиролцоод, хүлээж байх хооронд тамирчдын амарч байх үеийн зураг" гэж тайлбарласан. Олимпийн хорооноос Азийн залуучуудын наадамд явсан тамирчдад тодорхой хэмжээний санхүүжилт олгосон. Харин яамны зүгээс бол тив дэлхийн уралдаан тэмцээнд явуулдаг 26 төрлийн холбоодтой гэрээ хийгээд тухайн холбоодод санхүүжилт өгдөг.

Тухайлбал, Жүдогийн холбоонд энэ жил 700 гаруй сая төгрөгийн санхүүжилт олгосон юм билээ. Үүн дээр нэмээд бид Биеийн тамир, спортын хороон дээр бэлтгэл хийх өрөө тасалгаагаар үнэ төлбөргүй хангаж өгч дэмжлэг үзүүлдэг. Холбоод харин олгосон төсвийг хэрхэн захиран зарцуулахаа өөрсдөө мэддэг.

МУГТ Г.Отгонцэцэг албан ёсоор надад хандсан зүйл байхгүй. Цахим орчинд сэтгэгдлээ илэрхийлсэн юм байна гэж ойлгосон” гэлээ.

Н.Цолмонбаатар