Оросын өмнөд хэсгийн Саратовын газрын тосны үйлдвэрийг өнгөрсөн шөнө онилж олон тооны дроноор цохилт өгсөн гэж Украины Ерөнхий штаб Даваа гаригт (2025.11.03) мэдээллээ. Роснефть компанийн харьяанд байдаг энэхүү үйлдвэр нь Оросын хамгийн хуучны үйлдвэрүүдийн нэг бөгөөд жилдээ 4.8 сая тонн газрын тос боловсруулах хүчин чадалтай. Ням гаригт болсон цохилт нь намрын улиралд хийсэн Украины дөрөв дэх удаагийн дайралт болжээ.

Хараат бус "Astra" агентлаг цахим сүлжээнд цацагдсан бичлэгүүдийг шинжилсний үндсэн дээр довтолгооны бай нь Саратовын газрын тосны үйлдвэр байсан гэж баталсан байна. Саратов мужийн захирагч Роман Бусаргин Телеграм дээр бичихдээ, Батлан хамгаалах яамнаас бүс нутагт дроны халдлагын талаар сэрэмжтэй байхыг анхааруулсан гэжээ. Оросын Батлан хамгаалах яам өнгөрсөн шөнө нийт 64 нисгэгчгүй онгоцыг буудсан гэж мэдэгдсэн байна. Эдгээр пуужингийн 29 нь Саратов, 29 нь Ростов, мөн бусад нь Волгоград, Белгород, Ставрополь мужуудад цохилт өгөх гэж байсан аж.

Саратовын нисэх буудал шөнөдөө түр хаагдсан ч Даваа гаригийн өглөө дахин нээгдсэн байна. Украины Ерөнхий штаб мөн Оросын цэргийн логистикийн баазуудыг онилсон гэж мэдэгджээ. Одоогоор хүний амь нас хохирсон мэдээлэл гараагүй байна. Орос улс Украины эрчим хүчний сүлжээнд бараг тасралтгүй дрон болон пуужингийн халдлага хийж байгаа. Украин үүний хариуд Оросын газрын тос боловсруулах болон эрчим хүчний байгууламжуудыг онилох нь нэмэгдэж байна.