Шинэ тэнгэр газар гэх шашны гаж урсгалын үйл ажиллагааны талаар итгэгчийн ар гэрийнхэн өнөөдөр /2025.11.04/ мэдээлэл хийв. Шашны гаж урсгал гэх “Шинэ тэнгэр газар” буюу “Шинчеонжи”нь БНСУ-аас дэлхий даяар тархан Lee Man Hee-ийн боловсруулсан номлол сургаал дээр тулгуурлан итгэгчдээ элсүүлдэг. Монголд “Монгол сувд сүм” гэх сүм нэртэйгээр үйл ажиллагаа явуулдаг байна.

Хохирогчийн хүүгийн хэлж буйгаар, “Ээж минь 2024 оны нэгдүгээр сараас энэ урсгалд элссэн. Бид нарт ойлгуулахдаа, нийгэмд сайн дурын үйл ажиллагаа явуулдаг сургалтын төв гэж хэлсэн. Өөрөө явж эхэлснээс хойш 1-2 сарын дараа намайг элсэхийг ятгаж эхэлсэн. Худлаа ярьдаггүй хүн худлаа ярьдаг болсон. Сүүлийн нэг жил би ээжтэйгээ, эх үр шиг байхаа больсон. Ээж маань намайг бүр “Чи сатаны сүнстэй учраас энд ирэхгүй байна” гэж хараадаг болсон. Улмаар 2025 оны есдүгээр сарын 16-нд сүм дээрээ нас барсан. Маш их харамсалтай байна. Өнөөдөр миний хэвлэлийн хурал хийж байгаа шалтгаан энгийн. Би энэ шашны муухай урсгалыг үгүй хиймээр байна. Эхлээд иргэдэд сэтгэлзүйн сургалт өгнө гэж ойлгуулдаг. Улмаар шашны урсгалдаа хүчээр итгүүлдэг. Өдөр бүр 20:00-21:00 цаг хүртэл хичээл хийлгэдэг. Мөнгө татдаг. Орлогынхоо 10 хувийг өргөлд өгөхийг шаарддаг. Сүмээсээ гармаар байна гэхээр дарамталдаг. Үндсэндээ энэ сүм хүний ажиллах, амьдрах,  суралцах гээд бүх эрхийг зөрчиж байна" гэв.

Хохирогч иргэн: “Энэ шашны урсгал нь Солонгос улсад Lee Man Hee-ийн гэх хүн үндэслэн “Шинчеонжи” нэртэйгээр 40 жилийн өмнөөс үйл ажиллагаагаа явуулж эхэлсэн юм билээ. Албан бус мэдээллээр Солонгос улсад 300 мянган итгэгч байдаг гэж тогтоосон. Харин Монголд Шинэ тэнгэр газар нэртэйгээр 10 гаруй жилийн өмнөөс орж ирсэн 12 мянга орчим итгэгч байдаг. Энэ урсгал нь хүмүүсийг хэрхэн элсүүлж авдаг вэ гэхээр, гадуур явж буй хүмүүст “Хувь хүний хөгжлийн сургалт, Сэтгэл засал, Англи хэлний сургалт, Виз гаргалтын зөвлөгөө өгнө” гэх мэтээр хуурч элсүүлдэг. Элсүүлснийхээ дараа бол “Бурхан бууж ирэх гэж байгаа, дэлхий сүйрэх гэж байгаа, мөнх наслах эрхтэй болно гэх мэтээр тархи угаалт хийдэг” гэв.

Манай ээжийн хувьд ааш зан нь эвдэрсэн, уур уцаартай, худлаа ярьдаг болсон. Сар болгон сүмийн хандив гэж 70 мянган төгрөг өгдөг байсан. Фэйсбүүк дээр уг урсгалыг эсэргүүцэгчдийн group хүртэл нээгдсэн байдаг. Энэ group дээр хүмүүс дандаа нэрээ нууцалж бичдэг. Учир нь тухайн хүмүүсийн бүх хувийн мэдээлэл байдаг учраас үргэлж айдастай байдаг. Энэ урсгалд таны ойр дотны хүмүүс элсэх вий, бас нэг хохирогч битгий нэмэгдээсэй гэж сэрэмжлүүлэх үүднээс нээлттэй мэдээлэл өгч байна" гэлээ.

Н.ЦОЛМОНБААТАР