Дэлхийн хамгийн өндөр IQ-тай хүн гэгддэг Ким Юн Хун АНУ-аас орогнол хүсч буйгаа зарлалаа. Өмнөд Солонгосын иргэн 36 настай тэрээр улс төр болон шашны хавчлагаас болж ийм шийдвэр гаргаж байгаа аж. Түүний IQ-г 276 гэдэг.

Ким Юн Хун өнгөрсөн Пүрэв гаригт "Х" хаягаараа 95 секундын бичлэг нийтэлсэн. Уг бичлэгтээ тэрбээр "Христийн шашинтай, дэлхийн хамгийн өндөр IQ-тай хүн гэсэн алдрын эзний хувиар би АНУ-аас орогнол хүсч байна. Өдгөө Өмнөд Солонгосыг Библийн үнэнийг дарангуйлж, Христийн шашны дуу хоолойг хорьдог, өвөг дээдсийнхээ хамгаалахаар тэмцэж байсан эрх чөлөөнөөс урваж буй Хойд Солонгосыг дэмжигч зүүний үзэлтэй засгийн газар захирч байна. Иймд энд үлдэх боломжгүй боллоо. Өнөөдөр Өмнөд Солонгосын засгийн газар эх орончдыг шийтгэж, коммунистуудыг алдаршуулж байна. Үнэнийг хэлвэл гэмтэн болж, итгэл бишрэлтэй нэгэн буруутан болж байна. Би бузар булай бүхний өмнө бөхийхгүй. Тийм ч учраас би итгэл үнэмшлийг хавчдаггүй, харин ч хамгаалдаг Америк улсаас орогнол хүсч байна" гэжээ.

Өөр нэгэн нийтлэлдээ тэрбээр "Өмнөдийн засгийн газар Хойд Солонгосыг дэмжигч болжээ. Тийм учраас би улс төр, шашны шалтгаанаар ерөнхийлөгч Трампаас орогнол хүсч буй анхны өмнөд солонгос хүн болж байна" гэж бичсэн.

Ким Юн Хун Шашны сургуулиудын холбооноос магадлан итгэмжлэгдсэн АНУ-ын шашны сургуульд мастерын хөтөлбөрийг дүүргэжээ. Түүний дурдаж буй шашны хавчлага нь Бусан хотын Саероро сүмийн пастор Сон Хён-бокийн хэрэгтэй холбоотой бололтой. Тодруулбал, Сон Хён-бок ерөнхийлөгчийн сонгуулийн үеэр тодорхой нэгэн нэр дэвшигчийг дэмжиж, сонгуулийн хууль тогтоомжийг зөрчсөн хэргээр есдүгээр сард яллагдагчаар татагдсан юм.

Ким Юн Хуныг дэлхийн хамгийн өндөр IQ-тай хүн гэж Солонгосын бүртгэлийн хүрээлэн болон Дэлхийн оюун ухааны спортын хороо хүлээн зөвшөөрсөн байдаг. Дэлхийн оюун ухааны спортын хороо өнгөрсөн оны долдугаар сард цахим хуудсандаа Ким Юн Хуныг 276 оноо авсныг баталгаажуулан зарлажээ.