Оросын баруун хойд хэсгийн Вологда хотод хаан Иван IV, өөрөөр хэлбэл Догшин Иван хэмээх тодотголтой хааны 9 метр өндөр хөшөөг босгосон гэж Коммерсант сонин мэдээлжээ. Энэхүү хөшөө нь Вологдагийн Кремль орчимд байрлаж байгаа бөгөөд Оросын Үндэсний эв нэгдлийн өдрийг тохиолдуулан Мягмар гаригт (2025.10.04) албан ёсоор олон түмэнд үзүүлсэн байна. Догшин Иваны хөшөөг уран барималч Михаил Красильников бүтээсэн. Тэрбээр өмнө нь өөр нэг хотод Иосиф Сталины хөшөөг урлаж байсан туршлагатай. Одоогийн байдлаар Догшин Иваны шинэ хөшөөг босгох төслийн өртөг ил болоогүй байна.

Вологда мужийн амбан захирагч Георгий Филимонов Догшин Иваны хөшөөг босгох санаачилга гаргасан. Учир нь Догшин Иваныг Вологдагийн соёл, бэлгэдлийн дүр хэмээн үзэж байна. Догшин Иван хаан Софийн сүм, Вологдагийн Кремль зэрэг гол барилгуудыг барих тушаал буулгаж байсан. Мөн опричнина хэмээх бодлогын үед Вологдаг өөрийн засаглалын төв болгох тухай хэлэлцэж байсан гэдэг. Гэсэн хэдий ч түүний засаглалын үед ард иргэдэд дарамт шахалтаар дүүрэн, цаазаар авах ял олширч байсан тул дарангуйллын үе гэж түүхэнд тэмдэглэгдэн үлдсэн байдаг.

Гэвч Догшин Иваныг “Оросын газар нутгийг тэлсэн нэгэн” болон “Ертөнцийн бэлгэдэл” гэж магтан сайшааж, хүчирхэг дайчин, дарангуйлагч, байлдан дагуулагч хэмээн Филимонов  нэрлэжээ. Тэрбээр өнгөрсөн жил мөн Сталины хөшөө босгохыг дэмжсэн бөгөөд үүнийг олон нийтийн хүсэлтэд нийцсэн гэж тайлбарласан байна. Филимоновын албан өрөөнд Сталин, Ленин, Бериа, Дзержинский нарын хөрөг зураг болон өөрийг нь Сталинтай гар барьж буйгаар дүрсэлсэн уран зураг байдаг аж.