Израиль болон АНУ-ын довтолгооны улмаас эвдэрсэн атомыг байгууламжуудыг өмнөхөөс нь илүү бат бөх болгож сэргээнэ гэж Иран улс Бямба гаригт (2025.11.01) мэдэгдэв. Үүний зэрэгцээ Оман улс Иран болон АНУ-ыг цөмийн хэлэлцээгээ дахин эхлүүлэхийг уриалжээ. Өмнө нь АНУ-ын ерөнхийлөгч Дональд Трамп Ираны атомын хөтөлбөрийг устгасан гэж мэдэгдсэн боловч үнэн хэрэгтээ хэр их хохирол учирсныг тодорхойлоогүй байсан. Ираны ерөнхийлөгч Масуд Пезешкиан өнгөрсөн долоо хоногийн сүүлээр атомын байгууллагад айлчилж, хохирол амссан байгууламжуудыг сэргээнэ гэж мэдэгджээ.

Тэрбээр Ираны эрдэмтэд атомын мэдлэгээ хадгалсаар байгаа гэж онцлон тэмдэглэсэн байна.

Энэ оны зургадугаар сард Израиль улс Ираны эсрэг томоохон цохилт өгч, атомын болон цэргийн байгууламж, орон сууцны бүсүүдийг сүйтгэжээ. Эл үеэр Ираны хэд хэдэн өндөр албан тушаалтан амиа алдсан юм. Үүний хариуд Иран Израилийн хотууд руу пуужингийн довтолгоо хийсэн. Ираны гадаад хэргийн сайд Аббас Арагчи долдугаар сард Иранд учирсан хохирлыг ноцтой, хүнд учир хариу арга хэмжээ авсан гэж мэдэгдэж байв. НҮБ өдгөө Ираны цөмийн хөтөлбөрийн эсрэг хориг арга хэмжээгээ сэргээгээд буй.