АНУ Карибын тэнгист цэргийн хүчээ нэмэгдүүлж буй энэ үед Венесуэлийн ерөнхийлөгч Николас Мадуро ОХУ-ын ерөнхийлөгч Владимир Путинээс цэргийн тусламж хүссэн гэж Вашингтон Пост сонин мэдээллээ. Мадуро Венесуэлийн агаарын хамгаалалтыг сайжруулахад тусламж хүссэн байна. Тэрбээр 14 пуужингийн систем, Оросын үйлдвэрлэсэн Су-30 сөнөөгч онгоцыг засварлах, хөдөлгүүр, радарын шинэчлэл болон бусад логистикийн дэмжлэгийг хүсчээ. Түүний бичгээр гаргасан хүсэлтийг Венесуэлийн Тээврийн сайд өнгөрсөн аравдугаар сарын дунд үед Москва хотод айлчлах үеэрээ Оросын талд гардуулсан байна.  Мадуро захидалдаа Су-30 онгоцыг дайн гарсан тохиолдолд Венесуэлийн хамгийн чухал хамгаалалт гэж тодорхойлжээ.

Мөн Мадуро Оросын төрийн батлан хамгаалахын “Ростек” корпорацаас гурван жилийн хугацаатай санхүүгийн дэмжлэг хүссэн боловч тодорхой мөнгөн дүнг дурдаагүй байна.

Орос улс хүсэлтэд нь хариу өгсөн эсэх нь одоогоор тодорхойгүй байна. Венесуэл нь Өмнөд Америк дахь Оросын хамгийн ойрын холбоотнуудын нэг юм. Өмнөх удирдагч Уго Чавесийн үеэс хоёр улсын харилцаа бэхжиж ирсэн бөгөөд энэ онд Путин, Мадуро нар Москва хотноо стратегийн түншлэлийн гэрээ байгуулжээ.

Гэхдээ шинжээчид Вашингтон Пост сонинд хэлэхдээ, өөрийн дайныг явуулж буй Москва Венесуэлд туслах нөөц, сонирхол багатай байж магадгүй гэжээ.