Японы ерөнхий сайд Такаичи Санаэ ба Хятадын дарга Ши Жиньпин нар анх удаа уулзлаа. Уулзалт Баасан гаригт (2025.10.31) Өмнөд Солонгосын Кёнжү хотод болсон Ази-Номхон далайн эдийн засгийн хамтын ажиллагааны (APEC) дээд хэмжээний уулзалтын үеэр болжээ. Япон болон Хятадын удирдагч нар 30 минут үргэлжилсэн уулзалтаар хоёр орны харилцааг сайжруулах асуудлыг хэлэлцэв. Такаичи Хятад бол Японы чухал хөрш бөгөөд хоёр улс бүс нутаг, дэлхийн энх тайван, хөгжилд хариуцлага хүлээдэг гэж хэлсэн байна. Тэрбээр харилцан ашигтай, тогтвортой, хамтын ажиллагаанд суурилсан харилцааг хөгжүүлэхийг хүсэж буйгаа илэрхийлжээ.

Мөн Такаичи асуудал, зөрчлийг багасгаж, харилцан ойлголцол, хамтын ажиллагааг нэмэгдүүлэхийг зорьж байгаагаа онцолж, бодит үр дүн гаргахыг хүсэж буйгаа хэлсэн байна. Тэрбээр цаашид Ши Жиньпин даргатай илэн далангүй яриа өрнүүлэх, дээд түвшний харилцааг гүнзгийрүүлэх илүү олон боломж гарна гэж найдаж буйгаа илэрхийлжээ. Уулзалтын үеэр Такаичи Японы талаас Хятадын тэнгис дэх үйл ажиллагаа болон ховор металлд тавьж буй экспортын хязгаарлалтаар бусад оронд үзүүлж буй дарамтын талаар санаа зовж буйгаа уламжилсан байна.