Сайжруулсан шахмал түлш болон хагас коксон түлшийг нийслэлийн хэмжээнд 400 гэрээт цэгээр борлуулж байгаа билээ. Гэтэл сүүлийн өдрүүдэд иргэдээс түлшний талаарх гомдол мэдээлэл тасрахаа больсон. Тухайлбал, иргэдийн хэлж буйгаар 25 кг шуудай түлш бүрэн дүүргэлтгүй дутуу килограммтай зарагдаж байгаа талаарх гомдол их байв. 25 кг шуудай сайжруулсан шахмал түлш 3750 төгрөг, хагас коксон түлш 5000 төгрөгөөр гэрээт борлуулалтын 396 цэгээр борлуулж байгаа.

Тэгвэл энэ талаар нийслэлийн Засаг даргын орлогч А.Амартүвшин мэдээлэхдээ "нийслэлийн иргэдээс хоёр санал гомдол ихээхэн ирж байна. Үүний нэгээр сайжруулсан шахмал болон хагас коксон түлш килограммдаа хүрэхгүй 20-23 кг буюу 2-3 кг дутуу түгээгдэж байгаа талаарх гомдол ирсэн. Тиймээс нийслэлийн Налайх дүүрэгт байрлах Тавантолгой түлш компани дээр очиж уулзсан. Тавантолгой түлш компаний автомат машин 400 орчин тонн түлшийг тогтоосон жингээс дутуу савласан тохиолдол гарсан. Тиймээс түлш савлах автомат машины тохируулгыг шинэчилж 25-26 кг байхаар төлөвлөсөн. Харин дахиж иргэдийн зүгээс тогтоосон килограммдаа хүрэхгүй байна гэдэг гомдол мэдээлэл ирвэл Тавантолгой түлш компанид арга хэмжээ авна гэдгийг холбогдох албаныханд мэдээлсэн. Айл өрхүүдэд 1-3 кг түлш дутуу нийлүүлж болохгүй учраас түлшний асуудлыг шийдвэрлэж байна. Мөн бид газар дээр нь ажиллахад сайжруулсан шахмал түлш, коксон түлш 25 кг хүрч байсан. Тэгэхээр өмнөх өдрүүдийн зарим нийлүүлэлт автомат машины тохируулга алдагдаж нийлүүлэгдсэн гэдгийг олсон" гэв.

Энэ жил нийслэлд 43 мянган тонн мидлингийн шахмал түлш, 306 мянган тонн хагас коксон түлшийг нийлүүлнэ гэж албаныхан мэдээлсэн. Нийслэл Улаанбаатар хотын нэг өдрийн шахмал түлшний хэрэглээ 3100 тонн байдаг бол сарын үйлдвэрлэлийн дундаж тонн нь 75 мянган тонн байдаг ажээ. Улмаар өдрийн түлшийг 34 албан байгууллага гэрээт 400 цэгт нийлүүлэлт хийж байна.