Украинаас олзлогдсон хоёр хойд солонгос цэрэг өдгөө Киев хотын ойролцоох олзлогдогсдын хуаранд байрлаж байна. Өмнөд Солонгосын баримтат киноны продюсерыг очиж уулзах үеэр тэд Өмнөд рүү аваад яваач гэж гуйсныг Өмнөд дэх Хойд Солонгосын дүрвэгсдийн бүлгийн тэргүүн Жан Сэ Юл мэдээлэв. "Биднийг Өмнөд Солонгос руу аваад яваач" гэж цэргүүд нулимс дуслуулан хэлснийг Жан Сэ Юл дамжуулжээ.

Эргэн сануулахад, энэ оны эхээр Хойд Солонгосын хоёр цэрэг Украинд олзлогдож, ерөнхийлөгч Зеленский бичлэгийг нь нийтэлснээр олны анхаарлыг татаж байсан билээ. Цэргүүд 20 гаруй настай. Анх олзлогдсоныхоо дараа Өмнөдийн хууль тогтоогчтой уулзахдаа тэдний нэг нь л Өмнөд рүү явах хүсэлтэйгээ илэрхийлж байжээ. Эхэн үеэ бодвол тэдний шарх эдгэж, сэтгэл санаа нь ч харьцангуй тогтворжсон харагджээ. Мөн тэд байрлаж буй өрөөндөө Хойд Солонгосын удирдагч Ким Жон Уны хөрөг зургийг өлгөсөн харагдана.

Тэд баримтат киноны продюсераар дамжуулан нүдний эм, хувцас, өмд, тамхи, үзэг, ном сэлтийг хүсчээ.

Дашрамд дурдахад, Хойд Солонгос улс өнгөрсөн оны аравдугаар сараас хойш Украинд 15 мянган цэрэг байршуулсан. Олзлогдсон иргэдийн хүсэл зориг нь баттай бол шилжүүлэн авах санаатай байгаа гэдгээ Өмнөдийн тал мэдэгджээ. Гэхдээ энэ тал дээр бодитой хийгдсэн ажил одоогоор алга байна.