Өмнөд Солонгост болж буй АПЕК-ийн чуулганд оролцохоор АНУ-ын ерөнхийлөгч Дональд Трамп хүрэлцэн ирээд буй. Цагаан ордны хэвлэлийн төлөөлөгч Кэролин Левитт түүнийг дагалдан иржээ.

АПЕК-ийн чуулган хэдийгээр дээд хэмжээний дипломат арга хэмжээ боловч ирсэн зочдод хувьдаа зарцуулах хэсэгхэн цаг гарсан бололтой. Тодруулбал, Цагаан ордны цасан гоо, 28 настай Кэролин Левитт солонгос гоо сайхны бүтээгдэхүүн сонирхож, арьсандаа санаа тавьсныг "Korea Times" онцлов.

Тэрбээр инстаграм хуудсандаа худалдаж авсан гоо сайхны бүтээгдэхүүнүүдээ сонирхуулсан байна. Салфеткан маск, нүхжилтийн пад, серум, тосон цэвэрлэгч, нарны тос зэрэг худалдаж авсан 12 төрлийн бүтээгдэхүүнийхээ зургийг "Өмнөд Солонгосын арьс арчилгааны олдворууд" гэсэн тайлбартайгаар нийтэлжээ.

Түүний сонгосон бүтээгдэхүүнүүдийн зарим нь АНУ-д хэдийнэ од болсон брэнд аж. Тухайлбал, "Beauty of Joseon" брэнд нь ТикТок дээр хэрэглэгчдийг хуйлруулдаг. Мөн "Medicube" брэнд нь "Amazon"-ы шилдэг борлуулалттай бүтээгдэхүүнүүдийн жагсаалтыг байнга тэргүүлдэг. Харин салфеткан маскаараа алдартай "Mediheal" нь АНУ-ын эмийн сангуудын лангуунаа анхлан тавигдсан солонгос гоо сайхны бүтээгдэхүүнүүдийн нэг юм.

Дашрамд дурдахад, Кёнжү хотноо АПЕК-ийн зочид төлөөлөгчдөд зориулж "K-Beauty" сэдэвт павильон нээжээ. Кэролин Левитт худалдан авалт хаанаас хийснээ дурдаагүй ч зарим бүтээгдэхүүн нь “Olive Young exclusive” гэсэн шошготой байжээ.