АНУ-ын ерөнхийлөгч Дональд Трамп, Хятадын дарга Ши Жиньпин нар Пүрэв гаригт Өмнөд Солонгосын Бусан хот дахь агаарын баазад уулзлаа. Хоёр улсын худалдааны харилцаа хурцдахын хэрээр дэлхий нийт тэдний дараагийн нүүдлийг анхааралтай ажиж буй. Трамп, Ши нар хамгийн сүүлд 2019 онд уулзжээ.

Тэдний энэ удаагийн уулзалт нэг цаг 40 минут орчим үргэлжилсэн гэх боловч чухам юу ярилцаж хэлэлцсэн нь хараахан дэлгэрэнгүй гараагүй байна. Гэхдээ Хятад улс уулзалтын дараа АНУ-ын шар буурцгийн худалдан авалтыг сэргээж, ховор элементийн экспортыг үргэлжлүүлэн, фентанилын хууль бус худалдааг таслан зогсоох шийдвэрт хүрчээ. Харин АНУ хариуд нь Хятадын импортын татварыг 47 хувь хүртэл бууруулахаар тохирсон байна.

Яриа эхлэх үеэр Трамп Хятадын даргыг “Агуу улсын агуу удирдагч” гэж магтаад, “Бид маш олон зүйл дээр хэдийнэ санал нэгдсэн гэж би бодож байна. Одоо дахин хэд хэдэн зүйл дээр санал нэгдэх байх” гэжээ.

Харин Ши Жиньпин “Дэлхийн тэргүүлэгч эдийн засгуудын хооронд хааяа зөрчилдөөн гарах нь хэвийн үзэгдэл” гэж хэлсэн байна. Мөн “Салхи шуурга, сорилтуудын дундуур та бид хоёр зөв замаар явж, Хятад-АНУ гэсэн аварга том хөлгийг тогтвортой чиглүүлэх ёстой. Манай хоёр улс хамтдаа амжилтад хүрч, харилцан хөгжих бүрэн боломжтой” гэжээ.

Уулзалтаас гарч ирснийхээ дараа Трамп тэр даруй Вашингтон руу буцжээ. Харин Ши Жиньпиний цувуу Кёнжү хот руу хөдөлсөн байна. Ши Жиньпин АПЕК-ийн чуулганы хүрээнд Өмнөд Солонгост гурав хоног ирсэн билээ.