Эрүүл мэндийн даатгалын ерөнхий газар /ЭМДЕГ/ нь гэрээт эрүүл мэндийн байгууллагуудын гэрээний хэрэгжилтэд хяналт тавих, даатгуулагчдад чанартай тусламж, үйлчилгээ хүргэх, эрх ашгийг хамгаалах зорилгоор төлөвлөгөөт болон төлөвлөгөөт бус газар дээрх хяналт, шалгалт хийн ажилладаг. Энэ хүрээнд 2025 оны гуравдугаар улирлын байдлаар 30 лавлагаа шатлалын эрүүл мэндийн байгууллага, 19 эмийн санд төлөвлөгөөт хяналт, шалгалт хийжээ.

Даатгуулагчийн гомдол, мэдээлэл болон цаг үеийн нөхцөл байдалтай холбоотойгоор 13 лавлагаа шатлалын байгууллага, хоёр эмийн санд төлөвлөгөөт бус хяналт, шалгалтыг хийгээд байгаа аж.

Хяналт шалгалтаар илэрсэн нийтлэг зөрчлийг дурдвал, лавлагаа шатлалын эрүүл мэндийн байгууллагуудад хийсэн төлөвлөгөөт хяналт, шалгалтаар тусламж, үйлчилгээг үзүүлэхэд шаардагдах хүний нөөц болон тоног төхөөрөмжийн шаардлага хангалтгүй, нөөц хангалтгүй болсон тухайгаа гэрээний үүргийн дагуу мэдэгдээгүй зөрчил илэрсэн байна. Үүнээс гадна даатгуулагчдыг хэвтэн эмчлүүлж байх хугацаанд гаднаас эм тариа, эмнэлгийн хэрэгсэл өөрийн зардлаар авахуулсан, Эрүүл мэндийн даатгалын Үндэсний зөвлөл /ЭМДҮЗ/-ийн тогтоол, Эрүүл мэндийн даатгалын ерөнхий газартай байгуулсан гэрээнд зааснаас өөрөөр нэмэлт төлбөр авсан зэрэг зөрчлүүд илэрсэн талаар албаныхан мэдээлсэн юм.

Эмийн сангуудад хийсэн хяналт, шалгалтаар тусгай зөвшөөрөл дээрх хаяг байршилдаа үйл ажиллагаа явуулаагүй, даатгалаар хөнгөлөх эмийн нөөц хангалтгүй, “Эмийн санд тавих нийтлэг шаардлага” MNS 5260:2015 стандартын дагуу хүний нөөцийг бүрдүүлээгүй, эмийн сангийн нөөцийн өрөөний хаягжилт хангалтгүй зэрэг нийтлэг зөрчлүүд илэрсэн байна.

Түүнчлэн нэр бүхий эмийн сангуудад хуурамч жороор нэхэмжлэл илгээн даатгалын сангаас 56 сая төгрөгийн санхүүжилт авсан, хөнгөлөлттэй эмийн оронд ижил үйлчилгээтэй гэх сүлжээний бүтээгдэхүүн орлуулан өгсөн зэрэг зөрчил илэрч холбогдох арга хэмжээг авч ажиллаж байна.