Монгол Улсын Ерөнхий сайдын 2025 оны 67 дугаар захирамжаар байгуулагдсан Оюутолгой төслийн санхүүжилтийн хүүгийн зохистой байдлыг хянан үзэх, өөрчлөх асуудлаар хөрөнгө оруулагч талтай хэлэлцээ хийж, санал боловсруулах үүрэг бүхий ажлын хэсэг байгуулагдсан. Тус ажлын хэсгийг Сангийн сайд Б.Жавхлан ахалж байгаа юм.

Оюутолгойн зээлийн хүүгийн хувь хэмжээ хамгийн их анхаарал татаж байна. Тухайлбал, 2009 онд төслийн эрсдэл өндөр үед 11.1 хувийн хүүтэйгээр авсан зээл одоо эрсдэл бараг тэг болсон байхад ижил өндөр хүүтэйгээр үргэлжилж байгаа нь олон улсын жишгээс багагүй зөрүүтэй. Тухайлбал, Рио Тинто олон улсын зах зээлээс 4–5 хувийн хүүтэй зээл авч байж, Оюутолгойгоор дамжуулан хоёр дахин өндөр буюу 11.1 хувийн хүү тогтоож байгаа нь ноцтой дарамт үүсгэж байна. Сүүлийн 16 жилийн хугацаанд Оюутолгойд нийтдээ 26 тэрбум ам.долларын хөрөнгө оруулалт хийгдсэнээс 20 тэрбумыг нь зээлээр санхүүжүүлжээ. Энэ зээлийн 6.1 тэрбум ам.доллар нь Рио Тинтогоос авсан бөгөөд өнөөдөр хүүгийн хуримтлал нь анхны зээлийн хэмжээг давж, 12 тэрбум ам.долларт хүрээд байна. Өөрөөр хэлбэл, төлөх ёстой зээлийн талаас илүү нь зөвхөн “хүүгийн хүү” болж хуримтлагджээ. Эдийн засгийн хувьд ийм нөхцөл байдал Монгол Улсад ногдох өгөөжийг улам хойшлуулж, төсөлтэй холбогдох улс төрийн маргааныг ч гүнзгийрүүлэх эрсдэлтэй. Онтрэ компанийн хөрөнгө оруулалтын гэрээг зөв зохицуулалттайгаар шийдвэрлэх, түүнчлэн зээлийн хүүгийн асуудлыг 2025 оны хугацаа дуусахаас өмнө бодитой шийдвэрлэж бууруулах нь Монголын талд томоохон сорилт болоод байна. Тэгвэл Оюутолгой төслийн санхүүжилтийн хүүгийн зохистой байдлыг хянан үзэх, өөрчлөх асуудлаар хөрөнгө оруулагч талтай хэлэлцээ хийж, санал боловсруулах үүрэг бүхий ажлын хэсэг өчигдөр хуралдаж өнөөдөр буюу аравдугаар сарын 30-нд эхлэх хэлэлцээрийн бэлтгэл ажлын явцтай танилцаж, хөрөнгө оруулагч талтай хийх яриа хэлэлцээрийг Засгийн газраас баталсан удирдамжийн хүрээнд эхлүүлэхээр тогтсон байна.