ОХУ цэрэг татлагыг хавар, намартаа л зохион байгуулдаг. Гэвч дөрөв дэх жилдээ үргэлжилж буй дайн хүн хүчний хомсдолд ороод буй тул үүнийг өөрчилж, цэрэг татлагыг бүтэн жилийн турш хэзээ ч хамаагүй зохион байгуулах хуулийн төслийг батлав. Хуулийн төслийн гурав дахь буюу эцсийн хэлэлцүүлгээр батлагдсан уг өөрчлөлтөөр цэрэг татлага байнгын явцтай үйл ажиллагаа боллоо гэсэн үг.

Цэрэг татлагыг бүтэн жилийн турш явуулах ч гэлээ тэнцсэн цэргүүд хавар, намрын улиралд нэгдсэн журмаар албаа хааж эхлэнэ. Өөрөөр хэлбэл, зарлан дуудах, бичиг баримт бүрдүүлэх, сонгон шалгаруулах ажил жилийн аль ч үед хамаагүй явагдана.

ОХУ-ын одоогийн хуулийн дагуу 18-30 насны эрчүүд нэг жилийн хугацаатай алба хаадаг. Гэвч олон хүн өвчтэй, оюутан гэх зэрэг янз бүрийн шалтгаанаар мултрахыг оролддог. Нэг удаагийн цэрэг татлагаар дунжаар 130-160 мянган хүн дууддаг гэх тооцоо байна.

Хугацаат цэргийн албанд татагдсан залуусыг Украин дахь ажиллагаанд дайчилдаггүй гэж эрх баригчид мэдэгддэг. Эсрэгээрээ сайн дурынхан болон нөөцийн цэргүүдийг Украинд илгээж байгаа гэх. Гэвч ачир дээрээ хугацаат цэргийн албаныхныг сайн дурын алба хаагчаар бүртгүүлж, гэрээ байгуулахыг ятгадаг аж. Мөн цэргийн зарлангаас зайлсхийж байгаа хүмүүсийн банкны гүйлгээг хязгаарлах, жолооны эрхийг нь түдгэлзүүлэх, гадаадад зорчих эрхийг нь хорих зэрэг арга хэмжээ авдаг.

Ерөнхийлөгч Путин өнгөрсөн жил идэвхтэй алба хаагчдын тоог 180 мянгаар нэмэгдүүлж, 1.5 сая хүргэх зарлиг гаргасан. Эндээс 700 мянга гаруй нь Украинд тулалдаж байгаа гэж Путин өнгөрсөн сард мэдээлжээ.