Үндсэн цалингаа 3.5 сая төгрөгт хүргэхийг шаардсан багш нарын ажил хаялт өнөөдөр /2025.10.29/ ч үргэлжилж байна.  Боловсролын сайд П.Наранбаяр “Ирэх 2026 онд багш нарын цалинг 3.5 сая төгрөгт хүргэх эдийн засгийн боломж байхгүй. Ямарч байсан үндсэн цалинг нь 2 сая төгрөгт хүргэхээр Төсвийн байнгын хороотойгоо хамтраад ажиллаж байна. Энэ асуудлыг ярилцъя гэхээр Боловсрол, соёл, шинжлэх ухааны үйлдвэрчний эвлэлийн холбооноос хэлэлцээ хийхгүй байна” гэдэг мэдэгдлийг хийсэн. Харин Боловсрол, соёл, шинжлэх ухааны үйлдвэрчний эвлэлийн холбооны дарга З.Цогтгэрэл “Цалинг 3.5 сая төгрөгт хүргэхгүй бол ажил хаялт үргэлжлэх болно” гэдэг хариу тайлбар хийгээд буй. Иймд энэ долоо хоногийн VS  буландаа талуудын байр суурийг хүргэж байна.

Боловсрол, соёл, шинжлэх ухааны үйлдвэрчний эвлэлийн холбооны дарга  З.Цогтгэрэл:

-Боловсролын яамнаас аравдугаар сарын 22-нд бидэнд ямар нэг тооцоо судалгаа гарц гаргалгаагүй, хэлэлцээрээ эхлүүлье. Манай хэлэлцээрийн бүрэлдэхүүнд долоон хүн оролцох боллоо гэсэн хэлэлцээ эхлүүлэх бичгийг ирүүлсэн.  Түүнээс өмнө бидэнд эхлээд багш нарын цалинг 2026 оны нэгдүгээр сарын 1-нээс 20 хувь, долдугаар сарын 1-нээс 10 хувь нэмэгдүүлэхээр ажиллаж байна. Санал нэгдэх юм бол өргөн барихад бэлэн байна гэсэн. Энэ асуудлыг хүлээж авах боломжгүй байгаа. Боловсрол, соёл, шинжлэх ухааны үйлдвэрчний эвлэлийн холбооноос тэргүүлэгчдийн хурал  хийж, хэлэлцээ хийх бүрэлдэхүүнээ баталж, ажлын хэсэг болон тэргүүлэгчдийн өргөтгөсөн хурлыг аравдугаар сарын 24-нд хийсэн. Гэтэл энэ үеэр Засгийн газраас Боловсролын яам, Боловсрол, соёл шинжлэх ухааны үйлдвэрчний эвлэлийн холбооны хоорондын хэлэлцээ эхэллээ. Хэлэлцээгээ эхлүүлэх гэсэн боловч  холбоо ирэхгүй байна гэдэг мэдээллийг хэвлэл мэдээллийн хэрэгслээр цацлаа. Цалинг хүргэх түвшин буюу хүрсэн түвшингээсээ ахихгүй байгаа энэ асуудал дээр хүлээж авах боломжгүй гэдэг хариугаа өгсөн.  Нийт 598 байгууллагын 32 мянган багш ажил хаялтад нэгдээд байна.

Бид бүхний тэмцэл хөдөлгөөн үндсэн цалинг 3.5 сая болтол үргэлжилнэ. Бид багш нарынхаа хүсэлт болох үндсэн цалинг 2026 оны нэгдүгээр сараас 3.3 сая, 2025 оны долдугаар сарын 1-нээс 3.5 саяд хүргэх саналыг Боловсролын яаманд хүргүүлсэн.

Боловсролын сайд П.Наранбаяр:

-Бид багш нарынхаа үндсэн цалинг ирэх онд 30 хувиар нэмж хоёр саяд хүргэе гээд УИХ-ын Төсвийн байнгын хороотойгоо ярьж байна. Үндсэн цалин нь амьдралын баталгаа болгох бодлогын хүрээнд нэмэх боломж хайж байна. Ачааллын нэмэгдэл орж ирнэ, энэ орж ирэхээр нэлээд нэмэгдэл болно. Цалингийн бүтцэд өөрчлөлт оруулж, дээрх хэмжээнд хүргэхээр ажиллаж байна. Хамгийн гол нь Боловсрол, соёл, шинжлэх ухааны үйлдвэрчний эвлэлийн холбооныхон хэлэлцээний ширээний ард суух хэрэгтэй. Ингээд яваад байх юм бол юу ч шийдэгдэхгүй.

Тэд багшийн үндсэн цалинг 2026 оны нэгдүгээр сарын 1-нд 3.2 сая төгрөгт хүргэх, оны эцэст 3.5 сая төгрөг болго гэдэг шаардлага тавьж байгаа нь боломжгүй. Өнөөдрийн эдийн засагт хаана тэр мөнгө нь байгаа юм. 32 их наядын төсөв дотор урсгал зардал нь 17 их наяд. Тэр дотроо төрийн албан хаагчийн нийт цалингийн зардал 8.3 их наяд байхгүй юу.

Тийм учраас бид цалингийн бүтцэд өөрчлөлт оруулж байж шийднэ.  Тэгж байж үндсэн цалингийн эзлэх хувийг нэмнэ гэсэн үг. Нийслэлийн багш нарт ачааллын нэмэгдэл олгоно.

Г.ХОРОЛ